Feito aconceya cola ALLA, a la qu’asegura que FADE nun tien tomada una postura sobre la oficialidá

|
José Alba, Xosé Antón González Riaño, Belarmino Feito y Alberto González Menéndez reunión ALLA y FADE

Belarmino Feito, presidente de FADE, aceptó’l finalmente’l pidimientu d’entrevista de Xosé Antón González Riaño. El cabezaleru de la patronal aconceyó col dirixente de l’ALLA, que tuvo acompañáu por José Alba, y aseguró-y que’l so coleutivu nun tien tomada una postura sobre la oficialidá del asturianu y el gallego-asturiano.

“Mui prestosa y granible”, asina calificó González Riaño la reunión celebrada esta mañana na que tamién tuvo presente Alberto González Menéndez, direutor xeneral de la Federación Asturiana de Empresarios (FADE). Nella revisáronse estremaos aspeutos en rellaición cola política llingüística n’Asturies y coles posibilidaes d’oficialización del asturianu, treslladando’l presidente de l’Academia de la Llingua Asturiana (ALLA) “que, evidentemente, los empresarios (igual qu’otres estayes sociales n’Asturies) tienen muncho que dicir al rodiu d’estes cuestiones y tán dafechu llexitimaos pa facelo”, apunten dende la instución.

Al empar, dende l’ALLA quixo dexase afitao que l’exerciciu d’un derechu democráticu y constitucional, como ye’l usar la llingua propia, nun pue quedar amenorgáu pola mor de plantegamientos economicistes. Otra de les cuestiones que se punxeron enriba la mesa foi la inversión qu’una oficialidá, afayada a la realidá social y cultural asturiana, requier, afitando González Riaño que taría al rodiu del 0,5 por cientu de los presupuestos del país, cantidá “perfeutamente asumible pola nuesa comunidá y que, arriendes d’ello, repercutiría positivamente na dinamización socio-cultural y económica d’Asturies”.

Alba, profesor titular d’Economía Aplicada de la Universidá d’Uviéu, argumentó, con exemplos esbillaos de situaciones asemeyaes a les de nueso, les positives implicaciones que dende’l puntu de vista económicu –creación d’empreses y d’una industria cultural asturiana– llevaría darréu la puesta en práutica de la oficialidá de la llingua asturiana. Estes esplicaciones foron del interés de Feito, que treslladó a González Riaño que na so polémica intervención na presentación del telecospiu fecho pola so empresa énte autoridaes, ente elles el presidente Javier Fernández, plantegaba entrugues sobre les implicaciones de la oficialidá del asturianu nel ámbitu empresarial, pero non una toma de postura de la organización que preside sobre l’estatus xurídicu qu’habría tener la llingua asturiana.

Los dirixentes d’ALLA y FADE, qu'aconceyaron depués de la denuncia pública fecha por González Riaño tres dos pidimientos d'entrevista que nun atoparon nun primer momentu respuesta, quedaron en volver a xuntase nun futuru p’afondar nesti asuntu. D’igual forma, la institución académica ufrióse “pa contribuyir a una más fonda visualización de la llingua asturiana nel ámbitu empresarial”.

Contador Estadistiques