FADE considera que la Llei d’Usu del asturianu ye suficiente “pa caltener esti activu cultural”

La Federación Asturiana de Empresarios (FADE) asoleyó un comunicáu pola polémica xenerada poles declaraciones feches pol so presidente Belarmino Feito. Diz nun tar contra l’asturianu, que yá cuenta "con una importante dotación presupuestaria", y considera que la Llei d’Usu ye suficiente pa caltenelu.

La patronal mantién el mesmu discursu que’l so cabezaleru, entendiendo la oficialidá del asturianu y el gallego-asturiano non como una posibilidá de retornu económicu, sinón como un gastu. Asina insiste nel comunicáu en conocer “les consecuencies de la so hipotética implantación, qu’afeutará y implicará a la sociedá asturiana, en xeneral, y a los empresarios en particular”, emplegando una retórica mui asemeyada a la de Partido Popular (PP), y defende la so llexitimidá “pa participar nel debate públicu sobre la cooficialidá”.

“¿Qué va implicar nel día a día de les empreses: nes sos rellaiciones cola Alministración, procesos de llicitación, contratos, etc. ? Nuna de les rexones más avieyaes d’Europa y con necesidá d’atrayer y retener talentu, ¿ayudarános a ser una rexón más atractiva pal talentu y la inversión? ¿Cómo va a afeutar al accesu de los profesionales a la sanidá pública? ¿El conocimientu del asturianu va a ameyorar la calidá de los servicios sanitarios o será una barrera pa los ciudadanos y los profesionales? ¿Va a ameyorar la calidá de la enseñanza? ¿A qué costu? ¿Qué utilidad va tener, cuáles son los sos beneficios? ¿Cuánto va costar la cooficialidá? Nun contestu de contención presupuestaria, ¿de qué partíes se van restar esos fondos?”, son les duldes que tien la FADE sobre la cuestión, que darréu afirma nun tar “en contra de la llingua asturiana, que yá ta amparada por una Llei d’Usu y Promoción del Asturianu, con una importante dotación presupuestaria, una llei que cumple la so función de caltener esti activu cultural”.

Según espresa’l comunicáu, estes manifestaciones cuenten col sofitu plenu de los presidentes de les trés cámares de comerciu asturianes, Félix Baragaño (Xixón), Carlos Paniceres (Uviéu) y Luis Noguera (Avilés), colos qu’aconceyó esta mañana Feito.