Entama la puesta de la segunda dosis a menores de 60 años con Pfizer o AstraZeneca

Los más de 21.000 asturianos pendientes van poder refugar la primera pa recibir la d'Oxford. Esti xueves detectáronse 56 casos nuevos.

Melania Álvarez García, vocera del Gobiernu, confirmó qu'esta fin de selmana va entamar la vacunación a los menores de 60 años profesionales esenciales que recibieron la primer dosis de la vacuna Vaxzevria d'AstraZeneca. "Van recibir un mensaxe cola información específica sobre la vacunación frente a la COVID-19", esplicó.

De primeres, según la estratexa de vacunación estatal, van alministra-yos la Comirnaty de Pfizer/BioNTech, que pueden refugar pa completar la pauta cola de la mesma farmacéutica que la primera, pa lo qu'han roblar un consentimientu informáu. N'otres autonomíes, la gran mayoría, hasta un 90 por cientu en dalgún casu, optó por repetir con AstraZeneca, dalgo qu'esmolez a los autoridaes por un posible problema d'escasez d'esta vacuna.

El Ministeriu de Sanidá comunicó ayeri que se rexistraron a lo llargo de la campaña 4 muertes por eventos trombóticos en tol Estáu tres recibir la vacuna d'AstraZeneca, con un quintu casu n'estudiu. En total punxéronse 4.987.707 dosis, con 20 afeutaos por esti efeutu secundariu.

Quinta xornada ensin muertes

A falta de la espublización de los datos oficiales de la COVID-19, la Conseyería de Salú informó de la detección ayeri de 56 casos nuevos. Son 24 más que'l miércoles, cuando se rexistró la segunda meyor xornada del añu no que se refier a númberu de contaxos, un total de 32.

El Serviciu de Salú del Principáu d'Asturies (SESPA) fixo 2.334 pruebes de diagnósticu d'infeición activa, polo que la tasa de positividá s'asitió nel 3,43 por cientu. A 7 díes esta cantidá taba enantes de l'actualización nun 3,08 por cientu.

Yá s'acumulen cinco xornaes ensin muertes, dalgo que nun se daba dende'l branu, cuando s'enllazaron diez, en concreto del 24 d'agostu al 2 de setiembre. El númberu de finaos dende qu'entamó la andanciu sigue, poro, en 1.967.

Hai 65 pacientes hospitalizaos con confirmación o sospecha de COVID-19 en planta y otros 28 na UCI. Son 6 y 1 menos que'l miércoles, de manera respeutiva.

13 biltos activos

Asturies informó a Sanidá de la esistencia de 13 biltos activos, 2 más que la selmana pasada, con un total de 141 casos. 3 d'ellos detectáronse estos 7 díes últimos, comunica la conseyería.

Na imaxe, Álvarez García na rueda de prensa que siguió al Conseyu de Gobiernu d'esta mañana. Semeya obra d'Armando Álvarez.