8 xornaes siguíes ensin finaos cola COVID-19

El domingu rexistróse la cifra más baxa de contaxos del añu, con 28, nuna selmana na que se reduxeron, pasando de 53 a 51 diarios.

Nun se rexistren muertes cola COVID-19 n'Asturies dende'l sábadu 22 de mayu. A partir d'esi día, llueu d'ocho xornaes, l'acumuláu oficial sigue en 1.967 –l'actualización aumenta la cantidá en 2 más por casos non contabilizaos correspondientes a feches previes a esi 22 de mayu–, confirmándose l'efeutu de la campaña de vacunación pa torgar los casos graves de la enfermedá causada pol coronavirus SARS-CoV-2.

La cifra de casos nuevos sigue siendo asemeyada a la del restu de mayu, anque na selmana última se rexistró una pequeña baxada. Hebo 358 positivos, al pasar de 52.022 –1 más de los rexistraos nun primer momentu– a 52.380, polos 373 de l'anterior, lo que significa una media diaria de 51.

Dende l'entamu de la tercer fola esti datu evolucionó asina: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49 y 53, hasta los 51 actuales. La incidencia acumulada a 14 díes taba'l sábadu en 72,73 casos cada 100.000 habitantes.

Aumenta levemente la presión hospitalaria

Esta fin de selmana la Conseyería de Salú comunicó 167 casos nuevos: 72 el vienres, 67 el sábadu y 28 el domingu, la cantidá diaria más baxa del 2021. Hasta'l momentu la meyor xornada vivióse'l domingu pasáu, con 29.

La tasa de positividá quedó nun 2,30 por cientu al facese 1.697 pruebes de diagnósticu d'infeición activa, mentes que'l vienres quedó nun 4,57 por cientu y el sábadu, nun 4,19 por cientu. A 7 díes nesta xornada última esti porcentaxe yera del 3,24 por cientu –ayeri baxó al 3,17 por cientu–, cuando'l xueves taba nel 3,08 por cientu.

Hai 73 pacientes hospitalizaos con confirmación o sospecha de COVID-19, a los qu'hai que sumar 30 que tán na UCI. Son 8 y 2 más que'l xueves, de manera respeutiva.

Na semeya, autovac de La Pola Siero.