El Comité de Bioética da'l preste a la segunda dosis con AstraZeneca

L'órganu entiende que nel contestu actual ye ético plantegalo como alternativa ente los que refuguen la segunda dosis de vacuna Pfizer en proteición de la salú coleutiva y individual.

El Comité de Bioética de España respondió de manera favoratible a la consulta de la Direición Xeneral de Salú Pública del Ministeriu de Sanidá sobre "si ye éticamente almisible l'alministración de la vacuna d'AstraZeneca (baxo'l nome comercial de Vaxzevria) como segunda dosis a les personas menores de 60 años que voluntariamente lo soliciten, llueu de la decisión de la Comisión de Salú Pública del Sistema Nacional de Salud del pasáu 18 de mayu del 2021 d'usar la vacuna de Pfizer (Comirnaty) pa completar la pauta de vacunación iniciada cola vacuna d'AstraZeneca nel grupu de trabayadores esenciales menores de sesenta años, y too ello, nel marcu de la propia Estratexa de Vacunación frente a la COVID-19 y si, poro, nesti contestu ha permitise a diches persones escoyer la pauta a recibir en segunda dosis". Una situación na que tán 21.176 persones n'Asturies.

Finalmente la respuesta ye positiva, magar que caltién que "nel contestu actual de la pandemia, na qu'entovía nun disponemos de dosis de vacunes p'algamar una cobertoria universal y nel que la vida, integridá y salú de dalgunos grupos de población ta en mayor riesgu, entendemos que la vacuna a alministrar nun pue ser a demanda o escoyeta de los individuos". L'órganu consultor considera que "l'apaición del eventu adversu mui infrecuente pero grave cola vacuna de AstraZeneca (Vaxzevria), como ye'l síndrome de trombosis con trombocitopenia" nun ha alteriar "los criterios pa la toma de decisiones na Estratexa de Vacunación frente a la COVID-19, y permitir a les persones menores de sesenta años que recibieron una primera dosis de dicha vacuna, escoyer la vacuna de la segunda dosis".

Y ye que los espertos entienden que, nel casu de les les persones nesta situación qu'afiten el so "refugu firme a vacunase con un esquema heterólogu (Vaxzevria+Comirnaty)", ye dalgo éticamente aceptable "en proteición de la mesma salú coleutiva, y, inclusive nesti casu, de la salú individual" siempre qu'haya disponibilidá de vacuna. D'igual forma recomienden la firma d'un protocolo de consentimientu informáu específicu pa recibir la segunda dosis de Vaxzevria d'AstraZeneca.

L'informe contó, sicasí, con un votu particular, el de José Miguel Serrano Ruiz-Calderón. L'espertu coincide en que la propuesta ye dalgo éticamente almisible y en que ye aconseyable'l consentimientu informáu, pero nun ta d'alcuerdu en "dalgunos de los aspeutos y afirmaciones recoyíos".