Salú va anunciar esti vienres más flexibilizaciones

Van tar venceyaes al ociu nocherniegu o al usu de piscines, ente otres cuestiones. El miércoles rexistráronse 32 contaxos.

El conseyeru de Salú, Pablo Ignacio Fernández Muñiz, anunció ayeri "una actualización de dalgunos aspeutos de la última resolución de midíes pa la xestión de la pandemia esti vienres". Foi depués de la celebración del Conseyu Interterritorial del Sistema Nacional de Salud, nel que s'alcordó la toma de decisiones na selmana próxima sobre eventos multitudinarios o l'usu de mázcares, adaptando la normativa a la situación epidemiolóxica actual.

Enantes, mañana, van llegar flexibilizaciones n'Asturies en "cuestiones que tengan que ver colos establecimientos d'ociu nocherniegu, l'usu de piscines o dalguna otra consideración qu'haya que matizar". Asina, podría permitise l'apertura de pubs, que lleven pesllaos dende agostu.

Cuartu día ensin muertes

A falta de la espublización de los datos oficiales de la COVID-19, la conseyería comunicó ayeri la detección de 32 casos nuevos –l'actualización recueye 6 menos por duplicaos en díes anteriores–. Ye la cifra más baxa del 2021, namái perriba de los 29 contaxos del domingu.

El Serviciu de Salú del Principáu d'Asturies (SESPA) fixo 2.462 pruebes de diagnósticu d'infeición activa, polo que la tasa de positividá quedó nun 1,90 por cientu. A 7 díes esti porcentaxe yera'l martes del 3,24 por cientu –ayeri baxó al 3,08 por cientu–.

Yá se sumen cuatro xornaes ensin muertes cola enfermedá causada pol coronavirus SARS-CoV-2, situación que nun se daba dende ochobre, nel periodu que va del 2 al 5. Dende qu'entamó l'andanciu finaron un total de 1.967 persones.

Hai 71 pacientes hospitalizaos con confirmación o sospecha de COVID-19, a los qu'hai que sumar otros 29 que tán na UCI. Son 1 y 2 menos que'l martes.