El 78 por cientu de los neños de 5 a 11 años yá tien la vacuna

|
Vacunación neños

La selmana próxima va entamar la puesta de la segunda dosis nesti tramu. Detectáronse 1.137 positivos el miércoles, xornada de 7 finaos.

Los datos de vacunación de la Conseyería de Salú d'ayeri afita nel 77,90 por cientu'l porcentaxe de menores de 5 a 11 años que cuenta cola primer dosis de la vacuna. Estos datos permitieron a Asturies adelantase trés selmanes al oxetivu del 70 por cientu marcáu pa la viniente pol Ministeriu de Sanidá p'alministrar el preparáu nesti tramu d'edá

Hasta'l momentu namái ta aprobada la vacuna pa los mayores de 5 años, que van entamar a recibir la dosis de refuerciu la selmana próxima, principiando polos de 11 años. Otra manera, nestos momentos tienen la pauta completa un 86,94 por cientu de la población total, y la dosis de recuerdu, pa mayores de 30 años, un 81,96 d'esi tramu d'edá.

Baxa'l númberu d'hospitalizaos

Ayeri detectáronse 1.137 casos nuevos de COVID-19. Son 308 menos que'l martes, cuando se comunicaron 1.445.

Na xornada perdieron la vida 7 persones cola enfermedá causada pol coronavirus SARS-CoV-2, 5 homes de 92, 84, 83, 75 y 62, y 2 muyeres de 86 y 84. El total de finaos no que va d'andanciu queda en 2.328.

Hai 425 persones ingresaos polos 436 del día anterior. D'ellos, tán en planta 388 persones y 37 na UCI, 7 y 4 menos, de manera respeutiva.

Contador Estadistiques