El sindicatu COAG denuncia que Galicia quier arrampuñar con cuota llechera d’Asturies y otres comunidaes.

Oscar Sirgo, secretariu del sindicatu agrícola COAG-Asturies dio ayeri una rueda de prensa na que denunció'l parón que sufre'l procesu de redacción del nuevu plan llecheru. El dirixente de COAG echó-y culpa al Ministeriu d'enclicase "énte les presiones de Galicia, que ta torgando'l que salga alantre esti plan xugando puerco".

El dirixente de COAG esplicó que Galicia nun dio parte nel so día de l'auténtica producción llechera de la comunidá, polo qu'esta comunidá quedó, en cuota, mui perbaxo de la so producción real de lleche. Asina, Galicia produz el 52,45% penriba de la cuota llechera que tien conseñada, mientres qu'Asturies rexistra una sobreproducción del 15,78%. Sicasí, el mayor grau d'aplicación del sistema de cuota llechera n'Asturies, con tol sistema de sanciones que lleva arreyau fai que sían los ganaderos asturianos los que paguen mayores multes por producir penriba de lo que consiente la política agraria comunitaria, cerca de 800.000 euros nesti añu 2006, el 25% de tola multa que-yos toca pagar a los ganaderos españoles. En resultáu d'ello, Sirgo entiende que "mientres agora hai xente que pagamos multes por cumplir la llei, otros pretenden siguir valtando les regles del xuegu sistemáticamente y que se-yos compense a costa del esfuerzu de los ganaderos asturianos y d'otres comunidaes".

Ello ye que les autoridaes gallegues defenden que les comunidaes autónomes namás redistribuyan nos sos territorios el 50 por cientu de la cuota llechera que van lliberar los ganaderos del estáu, contra la propuesta del Ministeriu d'Agricultura, que quier que sían les autonomíes les que xestionen hasta un 80% d'esa cuota. Delles fuerces polítiques asturianes, casu d'IX, ven incluso curtia la propuesta del ministeriu y esixen que la comunidá asturiana puea xestionar y redistribuyir el 100% de cuota que s'abandone, pero ello ye que mientres n'Asturies hai más solicitúes d'abandonu de l'actividá que pa mercar cuota nueva, Galicia busca actualizar la so producción y por ello quier que l'Estáu tenga más cuota pa poder mercá-yla.

Pa COAG ye imprescindible que s'espublice'l plan llecheru pa que los ganaderos asturianos sepan a qué atenese y diz qu'amás Asturies tendría de marcase como oxetivu fundamental na negociación tratar de recuperar les tonelaes que se perdieron nel plan anterior. COAG-Asturies pidió-y a la Conseyera de Mediu Rural que nun ceda un rispiu na so defensa de los intereses d'Asturies, al empar que reclama una intervención espresa del presidente asturianu en defensa de los ganaderos asturianos énte lo que calificó de "intentu d'usurpación de la Comunidá vecina pa colos nuestros ganaderos".