El PSOE d’Avilés camienta zarrar l’espediente de la ordenanza por un informe desfavoratible de los servicios xurídicos

“Ye dalgo impresentable”, afirma Xune Elipe, conceyal de Somos Avilés, qu’acusa al PSOE avilesín de “garrase a un clavu ardiendo” pa nun aprobar la ordenanza d’asturianu. L’informe, que nun ye venceyante, pon en cuestión toles yá esistentes n’otros conceyos y nun tien en cuenta la Llei d’Usu y Promoción.

Robláu’l 4 d’ochobre, anque dende la candidatura de xunidá popular sospechen que los socialistes conocíen d’enantes el so conteníu, el documentu fina con un “se informa desfavorablemente el proyecto de ordenanza obrante al expediente”. Un espediente que’l PSOE camienta zarrar poniendo como escusa l’informe, lo que dexaría a Avilés ensin la Ordenanza Municipal pal Usu de la Llingua Asturiana nel Conceyu d’Avilés que’l Plenu aprobó redautar n’abril del 2016 –a propuesta de Somos colos votos a favor del PSOE, IX, Ganemos y Ciudadanos, y la oposición única del PP– y que l’equipu de gobiernu de Mariví Monteserín vieno dilatando hasta agora.

“L’informe nun ye venceyante, y nun ye la primer vegada que’l PSOE lleva a Plenu y aprueba cuestiones pese a contar con informes xurídicos negativos”, recuerda Elipe. “Amás, nun hai per onde lu garrar”, sigue l’edil, que critica que “en llugar de dicir qué partes son contraries a la llei, dedícase a analizalu xenéricamente”.

L’argumentu de que la llingua asturiana nun ye oficial y que’l Conceyu nun tien competencia p’aprobar una midida como ésta ye no que se basen los servicios xurídicos d’Avilés pa refugalu, que nun tienen en cuenta la Llei d’Usu y Promoción del Bable/Asturianu que “reconoz el derechu de tolos ciudadanos y ciudadanes a emplegar l'asturianu y a espresase nél, de palabra y per escrito, amás de refirise al ámbitu municipal nel so artículu 8.1 nel que dispón que «los Ayuntamientos asturianos van poder adoptar les midíes necesaries p'asegurar la efectividá del exerciciu de los derechos llingüísticos qu'esta Llei otorga a los ciudadanos residentes n'Asturies»”, apunta una nota de Somos Avilés na que tamién se citen les conclusiones de destacaos xuristes como Nicolás Bartolmé o José Manuel Pérez Fernández favoratibles a la posibilidá d’ellaborar ordenances d’asturianu. “Tolo que diz l’informe ye mentira y l’exemplu son toles ordenances qu’hai anguaño en vigor n’otros conceyos”, añade Elipe.

Barbón tamién incumpliría la llei

“El PSOE d’Avilés gárrase a un clavu ardiendo pa nun aprobales n’Avilés y nun vamos permitilo”, asegura l’edil, que califica a la formacióna avilesina como “el más antiasturianu, derechizáu y inmovilista de toda Asturies”. Asina, nel que casu de que, como paez, anuncie’l zarru del espediente na comisión de Cultura próxima, “vamos tornar a presentar una moción pa reiniciar tol procesu. A ver qué posición tomaría’l PSOE agora, si vota a favor o en contra”.

Esta situación “amuesa que nin Llei d’Usu, nin ordenances… Si nun hai oficialidá siempre va haber dalguien en na Alministración que ponga torgues al asturianu baxo’l ‘mantra supremu’ de la falta de la oficialidá”, denuncia Elipe. D’igual forma, Somos Avilés tamién recuerda que “indireutamente”, col so posicionamientu, el PSOE d’Avilés “acusa de ‘incumplir’ la Llei” al so secretariu xeneral n’Asturies, Adrián Barbón, que promulgó en Llaviana “una ordenanza práuticamente igual al testu del proyectu avilesín”.