Somos Avilés fai un pidimientu espresu pa tratar la situación de la ordenanza d'asturianu na Comisión de Cultura

L’informe “ensin pies nin cabeza” de los servicios xurídicos del Conceyu d’Avilés desfavoratible pa cola ordenanza d’asturianu lleva a Somos Avilés a mover ficha pa evitar la intención del PSOE llocal de zarrar l’espediente. Yá fixo un pidimientu espresu pa que tea dientro del orde del día de la Comisión de Cultura próxima.

“Ehí vamos presentar la nuesa disconformidá col informe”, esplica l’edil Xune Elipe, qu’apunta que la candidatura de xunidá popular contempla dellos escenarios. “Vamos solicitar un informe nuevu. Nel casu de que nun s’acepte esta posibilidá, forciaremos llevar les ordenances a Plenu”, asegura.

Nesi sen, recuerda que l’equipu de gobiernu socialista tien dao’l preste a delles cuestiones a pesar de contar con informes xurídicos desfavoratibles. Éstos nun son venceyantes.

“Si quixeren zarrar l’espediente de la ordenanza, tornaremos a presentar una moción al respeuto”, añade Elipe, qu’anuncia que nun va dexar pasar el tema. Esta selmana celébrase’l Plenu de payares, polo que la Comisión de Promoción y Cultura na que se va tratar la Ordenanza Municipal pal Usu de la Llingua Asturiana nel Conceyu d’Avilés va convocase nes selmanes próximes de cara al Plenu d’avientu.