Somos Avilés forcia la convocatoria de la Comisión de Cultura pa tratar de salvar la ordenanza d’asturianu

|
Casa Conceyu d'Avilés

A pesar de lluchar contra’l reló, por mor de la convocatoria d’eleiciones de mayu, Somos Avilés nun quier que l’alcuerdu plenariu pa la redaición de la ordenanza d’asturianu quede pa prau. Ta acabante de forciar la convocatoria de la Comisión de Cultura pal llunes al meudía, onde va proponer un testu alternativu.

“Hai que blindar los derechos y cumplir el mandáu plenariu del 2016 d’ellaborar una ordenanza, que contó col apoyu de tolos grupos, inclusive Ciudadanos, y la esceición única del PP”, apunta l’edil Xune Elipe. La fórmula plantegada foi, basándose nel artículu 7 del Reglamentu Orgánicu Municipal, forciar una convocatoria estraordinaria de la Comisión Informativa de Promoción Social y Cultura, al sumar l’apoyu d’Izquierda Xunida (IX), con un únicu puntu nel orde del día: “control y siguimientu del procedimientu d’ellaboración de la Ordenanza Municipal del Usu de la Llingua Asturiana”.

Yolanda Alonso Fernández, conceyala de Promoción Social y Cultura y presidenta de la Comisión, llevaba ensin convocar la Comisión dende xunu del añu pasáu, lo qu’impedía a los dos representantes de Somos Avilés el poder tratar na mesma la situación d’una ordenanza que’l PSOE frenó en payares tres un informe desfavoratible de los servicios xurídicos del Conceyu, un documentu discutíu por xuristes espertos en temes llingüísticos. Dende entós, namái reunía la Xunta del Patronatu de la Fundación Municipal de Cultura.

El llunes al meudía va celebrase diez meses depués dicha Comisión pa tratar por fin l’asuntu de la ordenanza d’asturianu. Somos Avilés va presentar un testu alternativu y va pidir a la secretaria municipal por vía d’urxencia la ellaboración d’un informe xurídicu “pa que, si’l PSOE quier, poder llevalu a Plenu y aprobalu enantes de que fine la llexislatura”, sentencia Elipe.

Semeya propiedá del Conceyu d'Avilés.

Contador Estadistiques