El Gobiernu busca coles sos cuentes l'afitamientu d'una Alministración moderna y de calidá

Rita Camblor, conseyera de Presidencia, presentó na Xunta los númberos del so departamentu nel proyeutu de Presupuestos.

La cantidá de la que va disponer ye de 200.101.789 euros, un 6,82 por cientu más nel 2019. Del mesmu, el 91,5 por cientu destínase a les polítiques de personal cola mira de consolidar una Alministración moderna y ufiertar unos servicios públicos de calidá a la ciudadanía, según esplicó la conseyera; en concreto estos oxetivos sumen 1.831 millones de los presupuestos, 103 más que nesti exerciciu.

El capítulu de personal inclúi la medría retributiva del 2 por cientu pa los emplegaos públicos, que representa unos 35,84 millones y ye’l máximu dexáu pola llexislación básica del Estáu. Les cuentes recueyen tamién el complementu asociáu a la carrera profesional de los funcionarios d'Alministración Xeneral y del Serviciu de Salú del Principáu (SESPA) pal personal temporal y pa los funcionarios de carrera, con un aumentu de 12,2 millones.

Bona parte de los aumentos respuenden a decisiones adoptaes l’añu pasáu, y en dellos casos col respaldu del Parllamentu. Por exemplu, la recuperación de la xornada de 35 hores.

Esta midida, xunida al amenorgamientu de la xornada llectiva a 18 hores, obligó a crear 1.213 places nueves qu'agora hai que sufragar. La cantidá necesaria xube a 18,5 millones.

Amás, ta prevista la creación d'otros 28 puestos: 12 para l'Alministración de Xusticia y 16 nel SESPA p’ampliar el serviciu de salú bucodental. Nesti casu, el costu xube a 281.337 euros.

Un funcionariu más pal xulgáu de les cláusules suelu

Nel capítulu de Xusticia, amás de les meyores nes polítiques de personal, caltiénse la prórroga de los seis funcionarios de refuerciu pal xulgáu especializáu en claúsules suelu, al que s’une un funcionariu más del Cuerpu de Tramitación de l'Audiencia Provincial. Esto va dexar mantener los estándares de calidá d'un serviciu que foi apocayá reconocíu pol Conseyu Xeneral del Poder Xudicial col Premiu de Calidá de la Xusticia.

Al respeutive de la modernización teunolóxica, nel 2020 va siguise cola implantación del espediente xudicial electrónicu pa rematar, n'abril, cola puesta en marcha de la Fiscalía Dixital y la sede xudicial electrónica. Pa dar soporte téunicu y funcional a toos estos órganos, se prevé llicitar un contratu nuevu con 190.000 euros.

El compromisu del Gobiernu col derechu d'accesu a la defensa xurídica pa tola ciudadanía tien el so reflexu nel aumentu de 320.000 euros nes cuentes destinaes a sufragar les actuaciones de los Colexos d'Abogaos. Les inversiones n'infraestructures tán dotaes con un millón, lo que va dexar rematar les obres de meyora nel Tribunal Superior de Xusticia y na sede xudicial nueva de Ḷḷuarca.

Otres partíes

El presupuestu pa Presidencia tamién inclúi 4.026.823 euros pal Serviciu d'Emerxencies del Principáu (SEPA), incrementando esta partida en 1.056.450 p'aumentar la plantiya de bomberos; 1.461.330 euros pa Emigración y Memoria Democrática, de los que 1.377.000 van destinase, sobre manera, a ayudes a la comunidá asturiana nel estranxeru; y 985.000 euros pa la Direición Xeneral d'Alministración llocal, 885.000 euros más que nel 2019, ente otres materies. Mentes, l'Axencia de Cooperación al Desarrollo aumenta per segundu añu'l númberu de places del Programa Mocedá Asturiana Cooperante, una iniciativa d'educación pal desenvolvimientu que pretende averar esta realidá a la xente mozo.

Semeya obra d'Armando Álvarez.