El presupuestu de Barbón salva les enmiendes a la totalidá nun Plenu nel que Foro amuesa la so división

Asturies va contar con presupuestos nel 2020, los primeros del Gobiernu d’Adrián Barbón. PP y VOX quedaron solos apoyando les enmiendes a la totalidá xunto con Pedro Leal, que frayó la disciplina de votu de Foro, qu’optó pola astención, al igual que Ciudadanos.

PSOE, Podemos y Asturies pela Izquierda votaron en contra, polo que’l resultáu final de la votación foi de 12 sofitos a les enmiendes, 9 pol PP énte l’ausencia d’un diputáu, los 2 de VOX y Leal, parllamentariu de Foro que desobedeció la decisión de la Comisión Direutiva del partíu, por unanimidá, de “nun presentar enmienda a la totalidad a los Presupuestos de 2020, y nun sumase a nenguna de les que se presenten”, según confirmara la selmana pasada Adrián Pumares, l’otru representante de la formación asturiana na Xunta Xeneral. D’esta forma esceneficóse per primer vegada nel Parllamentu la división en Foro yá conocida ente los partidarios de Carmen Moriyón, presidenta y con mayoría d’apoyos na Comisión Direutiva, y del fundador Francisco Álvarez-Cascos.

Tres pasar el primer trámite, el llunes va aprobase’l Proyeutu de Llei de Presupuestos Xenerales pal 2020 tres tratar les enmiendes parciales al mesmu. D’esta forma, Barbón consigue sacar alantre les sos primeros cuentes tres unes llargues negociaciones nes que tuvo siempre fuera VOX.

Na semeya, la conseyera de Facienda, Ana Cárcaba, defende les cuentes na Xunta Xeneral con Barbón y el restu del grupu parllamentariu socialista al fondu.