El PP apóyase na 'caverna' mediática de Madrid p'atacar los derechos llingüísticos n'Asturies

|
Cartelu conferencia antibable del PP

El Seminariu del Partido Popular (PP) p’alertar a la población de los supuestos peligros de la cooficialidá queda finalmente reducíu a una charra en Xixón con trés convidaos y Mercedes Fernández. El maestru de ceremonies del actu ye Carlos Cuesta, ún de los miembros de la llamada 'caverna' mediática.

“Convién que los asturianos sepan ónde ta cada cual, porque’l PP nun quier xugar a nengún disimulu: refugamos la cooficialidá del asturianu y el castellanu”, aseguró Mercédes Fernández tres criticar al so sociu na candidatura al Congresu y a la FSA d’Adrián Barbón. “Nun ye un termómetru d’asturianía, porque somos tan asturianos como’l que más, defendemos la nuesa tierra con enfotu y dicimos a tolos ministros que tenemos que facer coses n’Asturies, rápido y bien”, añadió.

Sobre Foro, na clave electoral de competición nel ámbitu de la derecha, apuntó que l’alcuerdu de coalición pa les estatales en nengún momentu afító un compromisu de cooficialidá, recordando que debería necesitar l’aprobación de les Cortes si s’aprueba la so reforma n’Asturies. Nesi sen, y tres criticar a la formación d'Alvarez-Cascos por votar en contra de la propuesta de resolución del PP nel Alderique d'Orientación Política Xeneral pa “rechazar la cooficialidá del bable” y a Moriyón por sofitala nel Plenu “xuniéndose a Podemos”, señaló apuntando que l’alcaldesa “nin siquier tuvo nes conversaciones enantes de firmar el documentu del alcuerdu”, desconociendo que’l programa eleutoral de Foro pa les nacionales del 2015 –previu a dichu alcuerdu– incluyía l’apoyu a la oficialidá “cuando se dean les circunstancies polítiques y el consensu social necesariu que permiten la reforma del nuesu Estatutu d'Autonomía”.

Los ponentes del actu

Fernández fixo estes declaraciones na presentación d’un charra entitulada ‘Asturiano, sí. Oficialidad, no’ baxo’l lema ‘Nos afecta a todos’, un actu anunciáu hai meses como Seminariu y nel que'l PP va usar pa refugar la oficialidá del asturianu exemplos de fuera d'Asturies, anque nengún de Galicia, onde'l PP gobierna con mayoría absoluta y xestiona con arguyu un procesu de cooficialidá.

La presidenta del partíu va ser ún de los intervinientes xunto con Rafael Arenas, caderalgu de Derechu y ex presidente de Sociedad Civil Catalana; Félix Fernández de Castro, doctor en Filoloxía y profesor de la Universidá d’Uviéu; y Joaquín López, un padre que salió en dellos medios de comunicación de la llamada caverna mediática denunciando una supuesta discriminación llingüística n’Illes Balears que lu llevaron a abandonar la isla y afincase n’Asturies, onde'l so casu tuvo repercusión nos medios impresos. La so muyer, Doris Burgstaller, que foi especialmente activa na denuncia del so casu, foi xerente de Círculo Balear, una entidá mallorquina venceyada a la estrema derecha y al partíu VOX.

Como maestru de ceremonies va exercer Carlos Cuesta, ún de los miembros que más rescamplen ente lo que se llamó hai años el 'TDT party' , un grupu de comunicadores qu'apaecíen en televisiones con idees estremistes y preconstitucionales nes canales de TDT, y mui cuestionáu pol so estilu agresivu. Anguaño Cuesta ye axuntu del direutor d’OK Diario, mediu dixital que difundió la noticia falsa sobre una llectura obligada en Secundaria sobre’l nacionalismu asturianu na inesistente materia de Cultura Asturiana.

La cita ye mañana, a les 19 hores, nel Centru de Cultura Antiguu Institutu de Xixón.

Análisis de les consecuencies de la cooficialidá

La líder popular afirmó na presentación d’esti actu que cola aplicación n'Asturies de la Constitución Española, nel puntu nel qu'afita la cooficialidá de les llingües “unos pocos quieren imponer a toos una llingua artificial que refuga la sociedá asturiana” y señaló que la charra tien la intención d’analizar les supuestes consecuencies que tendría la equiparación de derechos llingüísticos de los falantes d’asturianu colos de castellanu “na vida ordinaria de les families, nes ocupaciones cotidianes de les empreses y comercios, nel enseñanu y na universidá, nes rellaiciones de l’Alministración colos ciudadanos o na vida de los opositores”.

Contador Estadistiques