La Xunta Xeneral refuga una propuesta de resolución del PP pa “rechazar la cooficialidad del bable”

|
Xunta Xeneral

Un total de 159 propuestes de resolución votáronse na tercer sesión del Alderique d'Orientación Política Xeneral. El PP presentó una pa “rechazar la cooficialidá del bable” que la Xunta Xeneral refugó colos votos de Podemos, IX y Foro, y l’astención del PSOE.

Una esposición de les propuestes de resolución presentaes, a la que siguó’l posicionamientu de los grupos parllamentarios sobre les más importantes, abrió la xornada na Cámara. Na segunda parte, el diputáu d’Izquierda Xunida (IX) Ovidio Zapico encamentó al Gobiernu a nun obstaculizar el camín “imparable” hacia la oficialidá.

Mentes, el parllamentariu de Foro, Pedro Leal, anunció al PP que diba refugar la correspondiente al asturianu defendiendo la postura que vien calteniendo el so partíu “nel 2011, nel 2012 y agora”, esto ye, dixo, puxar por “un alcuerdu social” alredor del idioma siempre “na voluntariedá, non la obligatoriedá”, nel que se respete los derechos de los falantes d’asturianu al igual que los de castellanu. Tamién faló sobre l’idioma la socialista Nuria Devesa, qu’afaló a los populares a referise al mesmu como “asturianu, que non bable”, pa depués apuntar que’l Gobiernu “tien un posicionamientu claramente definíu” y anunciar l’astención del so grupu nesa resolución.

Asina, na votación la Xunta Xeneral refugó la propuesta pa “rechazar la cooficialidá del bable” gracies a les 17 votos en contra de Podemos (9), IX (5) y Foro (3) y l’astención del PSOE (14), con 14 a favor, los del PP (11) y Ciudadanos (3).

Contador Estadistiques