El PP dedica la charra sobre l’asturianu..., a falar del catalán

“Les autonomíes nun se pueden fotocopiar”, dixo Mercedes Fernández pa evitar la comparanza con Galicia, pero nel actu nun se fixo otro qu’equiparar Asturies con Catalunya

La oposición a la oficialidá del asturianu va ser el caballu de batalla del Partido Popular (PP) de cara a les eleiciones nacionales del 2019, con Foro na diana pola so postura –‘ambigua’ nel meyor de los casos– con respeuto a esti asuntu y con Carmen Moriyón, que suena como posible candidata, como oxetivu principal.

Ye lo que se pudo pescanciar na charra entitulada ‘Asturiano, sí. Oficialidad, no’ baxo’l lema ‘Nos afecta a todos’ celebrada ayeri en Xixón, pa la que'l PP movilizó a cargos, militancia y mocedaes –dexando pequeñu’l salón d’actos del Centru de Cultura Antiguu Institutu, con capacidá pa 120 persones–; espublizó cartafueyos sobre les supuestes consecuencies de la cooficialidá; ellaboró cartelos, fixo propaganda paga en dellos medios y editó un videu nel que señalaba a Moriyón y Foro de manera destacada.

Los populares llamaron a zarrar files y a l'asistencia a los sos altos cargos polo que nes butaques del Salón d'Actos víense dende dirixentes asturianos a conceyales de toa Asturies, como Agustín Iglesias Caunedo. Nun faltaron vieyes glories de la organización como Isidro Fernández Rozada, famosu cuantayá pola so oposición al asturianu y les sos referencies a la so tía, Nemesia, una falante d'asturianu que nun entendía l'asturianu escrito.

Ésta foi la puesta n’escena d’un actu qu’abrió Fernández con un discursu nel que repitió los argumentos que vien defendiendo nos meses últimos contra la cooficialidá del asturianu; imposición, obligatoriedá y gastu.

Darréu, tres la emisión del videu y cola líder popular yá ente’l públicu, entamaron les intervenciones, que se centraron en tratar de discutir la categoría de llingua del asturianu, n’insistir en que la cooficialidá supondría imposición y obligaciones pa tola ciudadanía, sobremanera n'aventurar lo que supuestamente pasaría n’Asturies comparándola col casu catalán y n’afirmar que la equiparación de derechos llingüísticos y l'aplicación de la Constitución asitiaría les bases d’un nacionalismu asturianu.

Carlos Cuesta, direutor axuntu d’OKDiario y ún de los miembros de la llamada 'caverna' mediática de Madrid, encargóse de moderar la charra, pa la que taben convidaos Félix Fernández de Castro, doctor en Filoloxía y profesor de la Universidá d’Uviéu; Joaquín López, que vino p'Asturies cola familia que denunciara un casu de discriminación llingüística nuna escuela d’Illes Balears; y Rafael Arenas, caderalgu de Derechu y ex presidente de Sociedad Civil Catalana.

El periodista empezó fuerte la so intervención señalando que “nun se fai una comunidá puntera convirtiéndola nuna aldea” y bromiando na presentación de Fernández de Castro con un “dende la punta izquierda, y nun va con indireutes…”.

El filólogu, espertu nel español d’América, nun duldó en falar de “las hablas románicas de Asturias”, presentándose contrariu a la so normalización y oficialización dende los sos tiempos d’estudiante, y criticó “los discursos victimistes” de les persones que tán a favor, “inclusive profesores de la facultá a los que respeto”, que falen de “derechu cultural y patrimoniu cultural”.

Félix de Castro esclarió que nun ye un espertu nel tema, -anque en delles cróniques periodístiques fálase d'él como un espertu- polo que taba dando opiniones personales: “A min pue gustame muncho’l prerrómanicu, pero nun voi a obligar a naide a construyir la so casa utilizando normes estétiques del prerrománicu”, añadió comparando cooficialidá con imposición y afirmando que d’aprobase ésta “los alumnos tendríen derechu a facer esámenes n’asturianu. ¿Qué faigo yo con esi esame? ¿Deprendo asturianu pa correxilo?”.

La pantasma del nacionalismu

Arenas, depués de que Fernández esplicara’l so casu, empezó a cargar contra’l nacionalismu, “que siempre empieza siendo moderáu y llueu acaba como tamos viendo”. Residente en Catalunya, entiende que “la oficialidá ye dalgo simbólico y cuando falamos d’oficialidá tamos falando de nacionalismu, que naide nun s’escaeza”. Ye dicir, un discursu que cuestiona'l caracter plurillingüe del estáu y de la reconocencia de los derechos llingüísticos que salió del pautu que dio llugar a la Constitución del 78.

Asina, ve como un problema falar de les llingües propies de los territorios billingües precisamente como llingües propies, “porque la otra pasa a ser impropia”. Por el contrario, Arenas sí se mostró favoratible a “promocionar el conocimientu d’una llingua, non el so usu”, esplicando más alantre que vería beneficioso que na escuela se deprendiera “les interferencies del bable” col castellanu, pa lo que punxo’l so exemplu, cuando marchó d’Asturies a Catalunya con 29 años.

“Facer consciente a les persones del desaxuste de la fala real materna y la llingua estándar ye recomendable y pue quitar munchos traumes”, añadió Fernández Castro, pero siempre refiriéndose al estándar castellanu.

"¿Pue falase de llingua asturiana?"

Tornando a discursos yá superaos, Cuesta entrugó al filólogu “¿Se puede hablar de una lengua asturiana?”, y esti volvió a falar d’una supuesta falta d’unidá del idioma. “El voluntarismu de l’Academia de la Llingua Asturiana ye emponderable”, espresó, “pero nun consiguieron aceptación social énte una realidá que naide nun pue contestar: la infinidá de les fales asturianes, que fai que los falantes nun se vean reconocíos”.

Cuesta, que primero d'entamar l'actu fixo declaraciones comentando que nun existe lliteratura importante n'asturianu, quixo tornar a ser protagonista cola afirmación “l’asturianu equí nun ta en nenguna fase, nin nel so desarrollu como llingua nin na so implantación” enantes de dar pasu al turnu d’entrugues, con intervenciones toes elles contraries al idioma.

Llamó especialmente l’atención la d’un ciudadanu que destacó “l’esfuerciu que me costó deprender castellanu” cuando yera mozu al tiempu que refugaba que la llingua que mamó de pequeñu en casa tuviera presencia na escuela.

Al igual qu’al restu de les persones que tomaron la pallabra, nun-y faltaron los aplausos de les 150 persones, les más d'elles cargos y militantes del PP, qu'enllenaben la sala.

Na semeya, Fernández, Cuesta, Arenas, López y Fernández de Castro.