El númberu de candidatures pal 28-M amplíase a 15

El 28 de mayu celébrense les eleiciones nacionales d’Asturies, nes que los votantes van poder escoyer ente 15 opciones polítiques. Son cuatro más que nes del 2019 –cuatro menos que nel 2015– los qu’aspiren a algamar representación na Xunta Xeneral na llexislatura nueva.

El Boletín Oficial del Principáu d’Asturies (BOPA) espublizó güei les candidatures presentaes énte la Xunta Eleutoral, llistáu entovía provisional, tando previsto que se proclamen les definitives el martes. Son les mesmos que va cuatros años más SOS Asturias-España Vaciada –que nel occidente lleva’l nome de SOS Occidente, xerme del proyeutu–, el Suma Principado de Pedro Leal, el Partido Unionista del Estado Español (PUEDE) y Por Un Mundo Más Justo (PUM+J).

Asina, repiten el PSOE, el PP, Ciudadanos-Partido de la Ciudadanía, Podemos Asturies, Foro, VOX, PCTE, Andecha Astur, Verdes EQUO Asturias y PACMA. Mentes Izquierda Xunida (IX) y Izquierda Asturiana (IAS), que se presentaren nel 2019 como ‘Asturias por la Izquierda-Asturies pela Izquierda (IU-IAS)’ sumen agora a la coalición a Más País baxo’l nome ‘Convocatoria por Asturias IU-Más País-IAS (IU-Más País-IAS)’.

De los candidatos con representación parllamentaria l’únicu que sobrevive de la campaña eleutoral anterior ye’l socialista Adrián Barbón, presidente del país. Diego Canga sustitúi a Teresa Mallada (PP), Manuel Iñara a Juan Vázquez (Ciudadanos), Cova Tomé a Lorena Gil (Podemos), Ovidio Zapico a Ángela Vallina (IX), Adrián Pumares a Carmen Moriyón (Foro) y Carolina López Fernández a Ignacio Blanco (VOX).

Xune Elipe’l 2 de la llista de Podemos y Faustino Zapico, el 5 de Convocatoria

Les opciones que nun s’integren en marques o federaciones de calter estatal son Foro, Suma Principado y Andecha Astur, que presenta a Diego Morís pola circunsripción central, a Ángel Pardo pola occidental y a Xabel de Cea pola oriental. En Podemos apaez como númberu 2 de la llista Xune Elipe y Faustino Zapico pasa d’ocupar el 6 al 5 na coalición d’IAS con IX, na que María Begoña Lueje va de 16 y José Luis Agüera de 27 pola central.

Tolos partíos preséntese poles trés circunscripciones, a esceición de PUEDE y Verdes EQUO, que van namás pola central, y PACMA, que nun participa na oriental. Tienen derechu a votu un total de 958.635 persones, de les que 835.451 residen nel país y 123.184 conformen el coleutivu emigrante, que nesta ocasión nun tien que rogar el votu llueu de l’aprobación de la reforma de la Llei Orgánica del Réxime Eleutoral Xeneral (LOREX) l’añu pasáu.