Echa a andar la campaña eleutoral del 28-M

Quince partíos o coaliciones preséntense a les eleiciones a la Xunta Xeneral, que coinciden, como marca l'Estatutu, coles conceyiles.

La campaña eleutoral yá ta en marcha. Arrancó esta medianueche cola tradicional puesta n'escena de pegada de cartelos y va allargase hasta la medianueche del vienres 26, pa dar pasu a la xornada de reflexón.

Queden per delantre quince díes nos que los diferentes candidatos van viaxar per Asturies pa pidir el votu y entamar mitinos, nel casu de los partíos estatales munches vegaes reforzaos por líderes llegaos de fuera d'Asturies. El partíu asturianista nuevu Aína, que nun se presenta nesta ocasión, tamién va entamar ún, el domingu 21 a les 12.30 hores na uvieína sala Gong, nel que va dar a conocer el so programa políticu.

Los 958.635 votantes, de les que 835.451 residen nel país y 123.184 tán inscrites nel CERA, el censu de residentes fuera d'España, van poder escoyer el 28 de mayu ente quince opciones: PSOE, PP, Ciudadanos-Partido de la Ciudadanía, Podemos Asturies, Convocatoria po Asturies (IX-Más País-IAS), Foro, VOX, PCTE, Andecha Astur, SOS Asturias-España Vaciada y SOS Occidente, Verdes EQUO Asturias, Suma Principado, PACMA, Partido Unionista del Pueblo Español (PUEDE) y Por un Mundo más Justo (PUM+J). Tolos partíos van poles trés circunscripciones, a esceición de PUEDE y Verdes EQUO, que van namás pola central, y PACMA, que nun participa na oriental.

A les conceyiles, mentes, pueden votar los 835.451 asturianos y asturianes, y 2.669 estranxeros residentes nel país. Amás, nesta xornada, tamién va haber eleiciones en 33 parroquies rurales.

Na imaxe, l'hemiciclu de la Xunta Xeneral dende la Presidencia. Semeya propiedá de la Xunta Xeneral obra de Kike Llamas.