Once candidatures preséntense a les Nacionales del 26-M

Les asturianes y asturianos van poder escoyer nes eleiciones a la Xunta Xeneral del 26 de mayu, que coinciden coles Europees y llocales, ente once candidatures, ocho menos que nel 2015. Foro y Andecha Astur son les úniques formaciones asturianes que se presenten, amás d’Izquierda Asturiana (IAS) en coalición con IX.

El Boletín Oficial del Principáu d’Asturies (BOPA) espublizó güei les candidatures presentaes énte la Xunta Eleutoral, llistáu entovía provisional, tando previsto que se proclamen les definitives el llunes. Nesta ocasión son once les fuercies que participarán nes Nacionales, un númberu inferior enforma a la d’hai cuatro años.

Unión Renovadora Asturiana (URAS), Escaños en Blanco, Movimiento de Renovación Democrática Ciudadana (Movimiento RED), UPyD, Agrupación de Electores Recortes Cero, MSR, Partido Humanista y FE de las JONS son los ocho partíos que nun van acudir a la cita coles urnes. Tampoco nun va facelo’l Partido Comunista de los Pueblos de España (PCPE), pero sí la so escisión Partido Comunista de los Trabajadores de España (PCTE), mentes qu’Izquierda Asturiana (IAS) torna a participar nunes Nacionales, nesta ocasión na coalición Asturies pela Izquierda xunto a Izquierda Xunida (IX).

Los once partíos presenten candidatos a les trés circunscripciones, a esceición de Verdes-EQUO, que nun va pel oriente.

Moriyón, Fernández Marqués y Vallina

Les trés úniques formaciones asturianes que participen nes eleiciones son Foro de Ciudadanos (FAC) y Andecha Astur, mentes qu’IAS escueye una coalición con IX. Pol partíu conservador va de candidata a la presidencia María del Carmen Moriyón, con Pelayo Martínez Díaz como númberu 1 pol oriente y Ana Isabel Mendéz de Andés, pol occidente, mentes que por Andecha repite Llucía Fernández Marqués, cabeza de llista tamién pa les Estatales del domingu y pa l'alcaldía de Xixón, con Bruno Gómez Jiménez pol oriente y Antonio Fuertes pol occidente.

Por parte d’Asturies pela Izquierda, Ángela Rosa Vallina ye l’aspirante a presidir del país, con Begoña Collado como candidata pol oriente y Francisco Javier Méndez Rodríguez pol occidente. Faustino Zapico, conceyal en Mieres y secretariu xeneral d’IAS, ocupa’l puestu 6 na llista pol centru, mentes qu’Iván Huerga va nel 16 y María Teresa Duarte, nel 23.

Na del oriente, Camilo Xabel Sousa va como númberu 2, y na del occidente, Inaciu Llope nel 3.

Nengún cabezaleru repite

Los seis partíos con representación parllamentaria, ente los que tán IX (Gaspar Llamazares) y Foro (Cristina Coto), nun repiten cabezaleru. El PSOE, formación que gobierna anguaño con Javier Fernández al frente, presenta a Adrián Barbón (Jimena Llamedo y Marcelino Marcos pol oriente y occidente, de manera respeutiva), mentes que’l PP, principal partíu de la oposición cambia, por mandáu de Madrid, a Mercedes Fernández por María Teresa Mallada (José Manuel Felgueres y Álvaro Queipo).

Tres la salida d’Emilio Léon, la persona escoyida en primaries pola militancia de Podemos ye Lorena Gil (Paula Valero y Andrés Fernández Vilanova ‘Ron’). En Ciudadanos-Partido de la Ciudadanía, tamién tres consultar a les bases, anque se trata d’una eleición del partíu, el candidatu ye l’ex rector Juan Antonio Vázquez (Rosario Montserrat Fernández Román y Fermín Rincón), treslladando a Nicanor García Fernández como númberu 1 del partíu por Asturies al Senáu.

El restu de formaciones que se presenten a les Nacionales son el Partido Animalista contra el Maltrato Animal (PACMA), con Claudia Suárez Martínez como cabeza de llista; Verdes-EQUO, con Eva del Fresno; PCTE, con Severino Menéndez Minas; y VOX, con Ignacio Blanco.