Los 70.000 euros pa la RTPA van destinase a doblaxes

Genaro Alonso, conseyeru d’Educación y Cultura, detalló na Comisión de Facienda y Sector Públicu les cuentes correspondientes al so departamentu pal 2018. Los 70.000 euros pa la RTPA van destinase pal doblaxe de llargumetraxe y programes infantiles.

Foi Fernando Padilla, direutor xeneral de Planificación Llingüística y Normalización, l’encargáu d’esplicar esti puntu que llevantó crítiques la selmana pasada ente los coleutivos de defensa del idioma al entender qu’estes perres deberíen salir del presupuestu del ente públicu de comunicación. Al respeuto, la Xunta pola Defensa de la Llingua Asturiana (XDLA) demandó qu’esta cantidá fora dafechu pa doblar dibuxos animaos, dada la importancia que tien l’animación na normalización de les llingües ente la reciella.

Les cuentes del 2018 destinen 1.677.000 euros al asturianu, 96.377 euros más qu’esti añu, lo que supón una medra del 6,14 por cientu. D’esta cantidá, 10.000 van dir pa l’Academia de la Llingua Asturiana (ALLA), polo que la institución ve aumentada la so financiación un 5,8 por ciento.

Nes intervenciones del restu de grupos parllamentarios, Concha Masa (Izquierda Xunida) intervino pa señalar que “la llingua, eternamente olvidada, debería estar presente también nos informativos" de RTPA. Tamién pidió una "actitud más dialogante" de la conseyería cola ALLA y la XDLA.

1.300 places pa Secundaria y FP

N’otros apartaos destaca l’impulsu d’una ufierta d’emplegu de más de 1.300 places de Secundaria y Formación Profesional cola intención de dotar d’estabiliá al profesoráu, y un aumentu del 18,61 por cientu na partida destinada a la rede de 0 a 3 años, que suma 11,45 millones, puntu ésti clave pa Podemos na negociación pa sofitar les cuentes y que paez insuficiente pa llegar a un alcuerdu pola demanda de gratuidá dafechu de la formación morada. Mentes, el Prerrománicu lleva 250.000 euros, con partíes pa la la illuminación del interior de Santuyano y trabayos de conservación en Santa María del Naranco.

El presupuestu total de Cultura y Educación ye de 808.868.970 euros, un 3,3 por cientu mayor que nel 2017.

Semeya obra d'Armando Álvarez.