Los coleutivos de defensa del idioma refuguen que la RTPA tenga partida específica pa la llingua asturiana

“Ye dar por fechu que TPA y RPA son cadenes en castellanu y que pa facer daqué n'asturianu hai que poner perres”, afirma la XDLA sobre la partida específica que tien l’ente públicu pal idioma. “Ye un precedente mui peligrosu”, asegura Iniciativa pol Asturianu.

Los 70.000 euros destinaos nel Proyeutu de Llei de Presupuestos Xenerales pal 2018 del Gobiernu pa la RTPA, amas de por insuficiente, ye refugáu polos dos principales coleutivos de defensa del idioma pol so significáu. “Dar perres a una cadena pública pa qu'emita n'asturianu ye actuar como si esta fora un mediu priváu: ye dar por fechu que TPA y RPA son cadenes en castellanu y que pa facer daqué n'asturianu hai que poner perres”, apunten dende la Xunta pola Defensa de la Llingua Asturiana (XDLA).

“RTPA yá tien 23 millones de presupuestu y si con 23 millones hai perres pa facer programes en castellanu, mercar telenoveles, firmar convenios con multinacionales norteamericanes, contratar a productores madrilanes y, sobre too, pagar a los directivos nuevos qu'entraron esti añu, tamién tien qu'haber presupuestu dientro d'esos 23 millones pa facer programes n'asturianu”, añade esta asociación. Por eso, pa da-y sentíu a esos 70.000 euros, solicita a la Conseyería d'Educación y Cultura qu'esixa a la direición “qu'esa partida se dedique integramente al doblaxe de dibuxos animaos n'asturianu”.

Aumentu “ridículu” de les perres destinaes a la normalización

Iniciativa pol Asturianu considera “probe” l’aumentu del presupuestu destináu a la normalización, 93.377 euros p’algamar un total de 1.677.000 euros. La cifra “ye ridícula si se pon en comparaza con otres del presupuestu. Por poner un exemplu, la Orquesta Sinfónica del Principado de Asturias, tien un presupuestu de más de 5 millones d'euros, mientres que tola política llingüística d'Asturies quier sacase alantre con poco más d'un millón y mediu. Les cifres d'esti exemplu al que podríamos añadir munchos más, rescamplen la falta de compromisu real cola normalización”, aseguren dende esti coleutivu.

D’igual forma, refuguen la partida pa la RTPA, que consideren “un precedente mui peligrosu que podría facer pensar que faer conteníos n'asturianu requier presupuestos especiales fuera del presupuestu xeneral del ente de comunicación”. Entienden que l’usu del idioma tien de salir de los presupuestos ordinarios: “La RTPA, que tien un presupuestu de más de 20 millones d'euros, nun precisa de 70.000 euros pa faer más y meyor programación n'asturianu, sinón de  la voluntá política pa faelo”.

Semeya obra d'Armando Álvarez.