El gallego-asturiano tamién va contar con pruebes oficiales de competencia nel idioma

|
Genaro Alonso tres un Conseyu de Gobiernu

El Gobiernu aceptó les demandes procedentes d’autoridaes y coleutivos del occidente del país y de l’ALLA y anunció que va ellaborar un decretu p’afitar los niveles de competencia nel usu del gallego-asturiano. El del asturianu yá ta n’información pública.

D’esta forma la fala del Eo-Navia va contar con pruebes de certificación adaptaes al Marcu Común Européu de Referencia pa les Llingües que permitan acreitar de manera oficial les competencies nel usu d’esta llingua. Un grupo d’espertos docentes y filólogos van principiar a trabayar na redaición del documentu l’añu qu’entra cola intención de tenela preparada lo enantes posible.

L’Academia de la Llingua Asturiana (ALLA) foi ún de les instituciones que reclamaron dar esti pasu, xunto a autoridaes municipales del occidente del país y dellos coleutivos, según confirmó la Conseyería d’Educación y Cultura. Hasta la fecha tanto l’asturianu como’l gallego-asturiano contaben con titulaciones referíes únicamente a la formación del profesoráu especialista, qu’esti pasu dau va ampliar a la ciudadanía en xeneral.

Nel casu de  la llingua asturianu, el decretu afita cinco niveles adaptaos al Marcu Común Européu de Referencia pa les Llingües: básicu A1, básicu A2,  intermediu B1, intermediu B2 y avanzáu C1. L’idioma, poro, va contar con pruebes oficiales de competencia nél como les tien anguaño unes cuarenta llingües, ente elles l’inglés, l’alemán, el gallegu, el catalán, l’eusquera o'l coreanu.

Na imaxe, el conseyeru Genaro Alonso nuna rueda de prensa tres un Conseyu de Gobiernu. Semeya obra d'Armando Álvarez.

Contador Estadistiques