L'ALLA solicita que'l gallego-asturiano tamién tenga prueba oficial de competencia nel idioma

|
Niveles del MCER

La institución felicita a la Conseyería d'Educación y Cultura pol avance col proyeutu qu'adapta l'asturianu al Marcu Común Européu de Referencia pa les Llingües.

Xosé Antón González Riaño, presidente de l'Academia de la Llingua Asturiana (ALLA), treslladó a Fernando Padilla, direutor xeneral de Planificación Llingüística y Normalización, la so satisfaición pola "acabación del Proyeutu de Decretu nel que s’afiten los niveles de competencia nel usu de la llingua asturiana, acordies coles llinies que fixa’l Marcu Común Européu de Referencia pa les Enseñances Llingüístiques". Agora, tres la esposición pública del documentu, aguarda que los trámites "nun s’allarguen nel tiempu y que’l Decretu vea la lluz bien llueu, de mou que los asturianos y asturianes a los que-yos pruya puedan acreitar el so nivel de competencia n’asturianu con calter oficial".

D'igual forma, "sabedora de lo complexo d’un procesu asemeyáu", l'ALLA afala a la conseyería a ver "la posibilidá de que s’entame’l trabayu que lleve a fixar los niveles llingüísticos del gallego-asturianu. Ello sedría especialmente importante pa la dignificación de la llingua eonaviega y pa da-y valir al so conocimientu ente los ciudadanos asturianos del Navia-Eo". Pa ello, pon a disposición de la conseyería'l sofitu de la Secretaría Llingüística del Navia-Eo.

Na semeya, los niveles qu'afita'l Marcu Común Européu de Referencia pa les Llingües, dende l'A (básicu) al C (avanzáu), pasando pol B (intermediu). L'asturianu va tener cinco: A1, A2, B1, B2 y C1.

 

Contador Estadistiques