El Decretu de Niveles de Certificación de Gallego-asturiano ta en procesu de redaición pa convocar la primer prueba nel 2022

La primer prueba de certificación de Gallego-asturiano adaptada al Marcu Común Européu de Referencia pa les Llingües va convocase finalmente’l cursu próximu. El Gobiernu ta nestos momentos redautando’l decretu qu’afite los diversos niveles de competencia y regule l’esame nesti idioma, al igual que se fixo col asturianu.

La Comisión Permanente Educación-Cultura entamó’l cursu pasáu la primer prueba de Llingua Asturiana, de nivel intermediu B2, esame previstu pa mayu que finalmente se celebró n’ochobre por cuenta de la pandemia de COVID-19. El decretu que l’afitaba aprobárase en Conseyu de Gobiernu en xunu del 2019, pero meses enantes, n’avientu del 2018, díes depués de la espublización del proyeutu nel BOPA pa pasar a información pública, l’Executivu anunciara que’l gallego-asturiano tamién tendría pruebes de capacitación del idioma tres los pidimientos llegaos d’autoridaes y coleutivos del occidente del país y de l’Academia de la Llingua Asturiana (ALLA).

La propuesta del Decretu de Niveles de Certificación de Gallego-asturianu ta nestos momentos en procesu de redaición, pa principiar col so trámite en cuanto tea aviada, según confirmó la Conseyería de Cultura, Política Llingüística y Turismu a Asturies.com. La previsión ye que la primer convocatoria sía finalmente’l cursu viniente, el 2021-2022, cuando tendrá llugar la tercera de Llingua Asturiana, idioma que nel actual, anque con fecha d’ochobre, va celebrar una prueba nueva de B2 y la primera de nivel avanzáu C1.

Na imaxe, aspirantes del B2 de Llingua Asturiana nun momentu de la prueba escrita. Semeya de la Direición Xeneral de Política Llingüística.