Educación y Cultura tien yá preparáu’l documentu que regula l’acreitación de conocencia d’asturianu

El proyeutu qu’afita los niveles de competencia nel usu de la llingua asturiana y que regula la prueba de certificación respeutiva adaptada al Marcu Común Européu de Referencia pa les Llingües yá ye una realidá. Tres la espublización de la so anuncia'l vienres nel BOPA, anguaño ta n’información pública pa la so consulta.

Genaro Alonso, conseyeru d’Educación y Cultura, anunciaba en mayu que la regulación sería efeutiva esti añu y los plazos tán cercanos a cumplise. A partir del vienres, cuando s’espublizó nel BOPA, comenzaron a correr los 20 díes hábiles d’esposición a la ciudadanía pa la posible presentación d’alegaciones enantes de siguir cola so tramitación.

Asina, toles persones podrán certificar la so conocencia d’asturianu, al igual que se fai con otros idiomes europeos como l’inglés, el francés, el gallegu, el catalán o l’eusquera. El proyeutu d’Educación y Cultura afita cinco niveles: básicu A1, básicu A2,  intermediu B1, intermediu B2 y avanzáu C1.

“D’esta forma úfrese a  la ciudadanía la posibilidá d’adquirir, d’alcuerdu coles sos necesidaes y a lo llargo de la vida, diversos niveles de competencia en llingua asturiana asturiana, de lo que depende la igualdá d’oportunidaes pal desarrollu personal, la educación, l’emplegu, l’accesu a la información y l’arriquecimientu de la comunicación”, apunta’l testu de la propuesta.