El Conceyu de Xixón presenta’l borrador d’un continuista Plan de Normalización 2020-2023

Los partíos y coleutivos presentes nel Conseyu Asesor de la Llingua de Xixón recibieron esti martes el Proyeutu de Plan de Normalización Llingüística correspondiente al periodu 2020-2023. Una Comisión va trabayar sobre esti documentu enantes de llevalu otra vegada al Conseyu y, darréu, al Plenu pa la so aprobación.

Poques novedaes presenta’l borrador del Plan de Normalización Llingüística de Xixón con respeuto al del periodu 2016-2019. Al igual qu’ésti, estructúrase al rodiu de les mesmes cinco estayes, anque con nomes diferentes: Alministración pública; enseñanza, tresmisión familiar y mocedá; socioeconómicu: comerciu y hostelería; ociu, deporte y actividá cultural; y medios de comunicación y nueves teunoloxíes.

Asina, la primer midía de les 88, que l’anterior Plan marcaba pa facese nel 2017, “adautar el Manual d’Identidá Gráfica del Conceyu que recueye la imaxe corporativa y los distintos logotipos a un usu billingüe” ye la mesma, agora con un plazu propuestu pal cuartu trimestre d’esti añu. El borrador, mentes, pierde “la creación d’ un programa pilotu del asturianu como llingua vehicular nel ciclu de 0-3”, n’estudiu nel anterior y escusa presentada nel so momentu pol PP p’astenese nel Plenu nel que s’aprobó’l documentu.

Ente les novedaes propuestes rescampla’l la solicitú “a la Xunta Asesora de Toponimia del Principáu d’Asturies qu’entame los trámites necesarios pa que’l nome del conceyu s’iguale col de la cabeza municipal, pasando a ser tamién Gijón/Xixón” esti mesmu añu, o la esixencia d’usu de la toponimia oficial “nes actividaes, actos y publicidá patrocinaos pol conceyu”.