El Conseyu Asesor de la Llingua de Xixón aprueba’l Plan de Normalización con namás un votu en contra

|
Xunta Conseyu Asesor de la Llingua de Xixón aprobación Plan de Normalización

El Plan de Normalización Llingüística de Xixón 2020-2023 va dir al Plenu d’abril pa la so aprobación definitiva depués del consensu algamáu nel Conseyu Asesor de la Llingua, que-y dio'l preste al documentu final con 12 votos a favor, incluyíu’l del PP. Namái VOX votó en contra, mentes que Ciudadanos astúvose.

Una comisión vieno trabayando nel borrador presentáu pol Conceyu de Xixón nel mes últimu. La mesma tuvo formada pol Partido Popular (PP), Izquierda Xunida (IX), CC OO Enseñanza, Iniciativa pol Asturianu y la Xunta pola Defensa de la Llingua Asturiana (XDLA), executando unes poques modificaciones al testu orixinal consistentes en cambios na redaición de la xustificación y de dalgunos de los puntos del Plan.

El documentu definitivu, que nun inclúi “la creación d’ un programa pilotu del asturianu como llingua vehicular nel ciclu de 0-3” como pretendía estudiar el Plan de Normalización Llingüística 2016-2019, al considerar les dificultaes llegales que supondría entamalu, llevóse ayeri a la xunta del Conseyu Asesor, que lu aprobó con 12 votos a favor, una astención y un votu en contra. La postura de VOX yera esperable, anque sorprende la de Ciudadanos, que votara a favor del anterior Plan, prácticamente idénticu al actual.

Ente les organizaciones que votaron l’aprobación del testu taba’l PP, formación que sorprendiera la selmana pasada con un corréu electrónicu al respeuto de testu dexando entrever que se descolgaba del mesmu. El so representante nel Conseyu Asesor, Francisco Manuel Alonso Sánchez, participara activamente na comisión de trabayu sobre’l borrador del Plan, aportando matices a la redaición final que concasaben cola sensibilidá del PP.

Esta redaición va llevase al Plenu del mes próximu pa la so aprobación, dao que nun daba tiempu a incluyilu nel de marzu, que se celebra mañana. De nun haber cambios marcaos poles direiciones de los partíos con postures ambigües con respeuto al idioma, el consensu esistente nel Conseyu Asesor de la Llingua con respeuto al Plan de Normalización Llingüística va repetise na Casa Conceyu.

Na redacción del plan anterior algamóse la unanimidá nel Conseyu Asesor, anque daquella la estrema derecha inda nun tenía representación y nel Plenu toles fuercies votaron a favor sacante'l PP que s'astuvo al nun compartir el puntu de les escueles de 0-3 propuestu por Reciella, que finalmente figuró nel plan anque nun se punxo en marcha.

Na semeya, un momentu de la xunta del Conseyu Asesor de la Llingua d'ayeri.

Contador Estadistiques