'Marxismu' nel PP de Xixón: 'llingua asturiana sí, pero non'

El PP del Xixón sorprendió'l xueves a los partíos y coleutivos que formen parte del Conseyu Asesor de la Llingua de Xixón con un crípticu corréu electrónicu sobre la so aportación al Plan de Normalización Llingüística correspondiente al periodu 2020-2023, nel que ta trabayando anguaño una Comisión a partir del borrador presentáu pol Conceyu.

Nel mesmu paez dexar entrever que se descuelguen del mesmu, anque sorprendentemente esti escritu entama con un párrafu nel que s'espresa que ta bien facer un Plan de Normalización pa cumplir colo qu'afita la Constitución, l'Estatutu d'Autonomía y la Llei d'Usu y Promoción del Bable/Asturianu.

Sicasí, nel párrafu siguiente  "concreten" qu'eses midíes nun pueden tar regulaes alministrativamente (sic).

El testu del PP paez tar escritu por dos persones distintes, yá que na primer parte dizse qu'hai que tomar midíes pa protexer l'asturianu y que "el Plan de Normalización Llingüística de Xixón aborda eses midíes necesaries".

Pero nun xiru de guión que contradiz l'afirmación anterior, el partíu de dereches diz que "El Partíu Popular de Xixón entiende qu'eses midíes necesaries a tomar pol Plan de Normalización pa consiguir el fomentu, estímulu y proteición de la llingua asturiana nun lleven a conformar o convertise nun instrumentu xurídicu alministrativu de calter normativu, con efeutos venceyantes pa l'alministración municipal en tolos sos estremos. Si la intención del Plan ye proyeutalu hacia la totalidá de l'actividá municipal y amás en rellación cola xeneralidá de los ciudadanos que se rellacionen cola mesma debería facese de forma que nun necesitase una disposición reglamentaria que nun creemos que se pueda executar al traviés d'un plan de normalización".

En definitiva, que pa regular la protección del "asturianu" nun fai falta un plan pa protexer l'asturianu. Al más puru estilu de los Hermanos Marx condicionáu ensin dulda polos malabarismos que tien que facer el PP pa romper col consensu entornu a la protección del idioma condicionáu pol so escoramientu a posiciones radicales emburriáu pola irrupción de la ultraderecha.