'El celtismu musical asturianu', temática del XX Seminariu d'Estudios Asturianos en La Puela

La Fundación Belenos celebra esti venti aniversariu de les xornaes con una Nueite Celta'l sábadu na que participa Llan de Cubel.

Esta fin de selmana entámase'l XX Seminariu d'Estudios Asturianos de la Fundación Belenos en La Puela, que va tar dedicáu a 'El celtismu musical asturianu' y cuenta yá con más de 60 inscritos. L'alcalde d'Allande José Antonio Mesa va abrir esta edición a les 10 hores xunto con un representante de la Conseyería de Cultura, Política Llingüística y Turismu, pa depués dar pasu a Ignaciu Llope, de la Fundación Belenos, que va poner la conferencia 'El celtismu musical asturianu: un averamientu críticu'.

Fonsu Fernández, direutor del Muséu de la Gaita, va siguir cola intervención '¿Fexo buelga’l celtismu na estaxa de la música tradicional?', pa darréu tomar la pallabra Lisardo Lombardía, direutor xeneral del Festival Interceltique de Lorient, con 'L’interceltismu na evolución y espoxigue de la música tradicional asturiana'. Va pesllar la mañana Xune Elipe, cantante de Dixebra y xestor cultural, que va dar la ponencia 'Rock’n’gaita: cuando los celtes empuñaron les guitarres eléctriques'.

Tres la xinta, a les 16.30 hores va principiar un conceyu abiertu baxo'l títulu 'El celtismu qu’amerita: la música celta en tiempos del post-folk' nel que van tomar parte Iñaki Sánchez Santianes, responsable de la delegación d’Asturies nel Festival Intercélticu de Lorient; el músicu y investigador Xosé Antón Fernández 'Ambás'; y la musicóloga Leticia Baselgas, cola moderación de Llorián García Flórez. Llueu, a les 18.30 hores nel Café Cento, va celebrase un alcuentru musical que va servir pa calecer motores pa la Nueite Celta.

N'alcordanza d'Elías García

El Mercáu Cubiertu de La Puela va acoyer estos conciertos abiertos a tola ciudadanía a les 22.30 hores, que se van convertir nun homenaxe a Elías García, integrante de Llan de Cubel fináu en setiembre. L'históricu grupu folk yá tenía apallabrada la so participación nesta cita tan especial con tantos collacios presentes enantes de tan murnia fecha y decidieron caltener l'actuación.

Completen la Nueite Celta otros grandes artistes como Mariluz Cristóbal Caunedo y Cantaruxare. Pa finar habrá un filandón con escenariu abiertu con música y baille del país.

El domingu va siguir el Seminariu d'Estudios Asturianos a les 12.30 hores con un repasu matreru sobre 'El vigulín celta asturianu / The Celtic fiddle' a cargu de Dolfu R. Fernández. A les 14.30 hores la xinta de tolos participantes va poner el ramu a les xornaes.

Mañana, día último d'inscripción

El preciu de la matrícula p'asistir a les actividaes ye de 35 euros, cola posibilidá d’agospiase en La Nueva Allandesa en réxime de pensión completa –dende la xinta’l sábadu a la xinta’l domingu, too incluyío dafechu– por 100 euros por persona. P’apuntase o algamar más información pue contautase cola Fundación Belenos nel teléfonu 680.114.090 vía llamada o nel corréu electrónicu seminariubelenos@gmail.com, con plazu hasta mañana