Les ponencies del XX Seminariu d’Estudios Asturianos recuéyense nel volume ‘El celtismu musical asturianu’

La Fundación Belenos y Goxe Producciones tán acabantes d’asoleyar ‘El celtismu musical asturianu’, volume que recueye les ponencies del XX Seminariu d’Estudios Asturianos, celebráu nel 2019. El llibru “fai un percorríu per distintos aspectos d'un fenómenu qu'influyó decisivamente na música asturiana contemporánea”, apunten los promotores.

Coordináu por Ignaciu Llope, les más de doscientes páxines inclúi toles intervenciones de los espertos convidaos pa les xornaes qu’acoyó La Puela en payares d’esi añu, anque nun son los únicos conteníos. Asina, l’antoxana fírmala’l gaiteru gallegu Carlos Núñez y el piesllu Roberto González-Quevedo, y atopénse artículos como ‘Diálogos ente un bouzouki y una pandereta: acordes de nostomanía y el poder de percutir piel’, de Leticia Baselgas y Rubén Bada (L-R), y otros que traten sobre'l Memorial Remis Ovalle, de Fe Santoveña; el Festival Interceltque de Lorient, d’Iñaki Santianes; y el vigulín n'Asturies, de Dolfu R. Fernández, que n’Allande diera un repasu matreru.

Completen el volume les conferencies ‘El celtismu musical asturianu: un averamientu críticu’, de Llope; ‘¿Dexó buelga'l celtismu na música asturiana?, de Fonsu Fernández; ‘Llembrances d'un camín iniciáticu. Notes sobre los comienzos del folk y l'interceltismu nos años 80 del sieglu XX’, de Lisardo Lombardía; y ‘Rock'n'gaita: cuando los celtes empuñaron les guitarres eléctriques’, de Xune Elipe, les cuatro que conformaron el programa del XX Seminariu d’Estudios Asturianos. “‘El celtismu musical asturianu’ ta llamáu a ser una ferramienta fundamental de consulta y divulgación d'un movimientu al que pue considerase'l más importante de la historia musical recién d'Asturies”, rescamplen.

Porque nél “trátense cuestiones distintes d'un fenómenu perimportante nel devenir de la música d'espresión asturiana históricamente y, mui especialmente, dende los años 70 hasta l'actualidá”. En definitiva, “un llibru col que conocer fondamente esti movimientu musical y el so desarrollu n'Asturies”.