El cambiu de postura de la FSA, meyor noticia pal asturianu del 2017

Resultó escoyida ente otres 15 propuestes con un 14,3 por cientu del total de los votos. Iniciativa pol Asturianu entama tolos años esta encuesta pela rede.

'La FSA-PSOE camuda la so postura y asume la oficialidá del asturianu tres la campaña del grupu de militantes Socialistes pola Oficialidá' ye la 'Meyor noticia del añu pal asturianu 2017' pa les persones que participaron na votación entamada n'Internet pol coleutivu cívicu nos quince primeros díes del añu. La enmienda, defendida na comisión de derechos ciudadanos del 32 congresu de la FSA-PSOE por María Luz Pontón, militante d’Uviéu, consiguió facese con más del 52 por cientu d’apoyos, frente al 31 por cientu del non y un 11 por cientu d’astenciones, y ratificóse darréu nel plenariu por un 82 por cientu de los delegaos, por un 13 por cientu que se posicionó en contra.

La segunda noticia más votada, mui cerca de la ganadora al recibir un 13,9 por cientu del total de votos, foi 'Educación arranca con ésitu’l plan pilotu pal usu del asturianu como llingua vehicular en Primaria', mentes que la tercer resultó 'L’asignatura de Llingua Asturiana entra de forma regulada per primer vegada n’Educación Infantil', con un 12 por cientu. N'años anteriores, les novedaes más importantes pal asturianu foron l’ésitu de los cómics d’Astérix n’asturianu (2013), la emisión del programa infantil 'Los Bolechas' (2014), l’anuncia d’Educación d’un proyeutu pilotu pa incluyir l’asturianu como llingua vehicular (2015) y la declaración d’oficialidá del asturianu otra vuelta en Bimenes (2016).

Asina tratamos n'Asturies.com la información ganadora nesta votación.