El feminismu asturianu torna a amosar un gran poder de convocatoria con motivu del 8-M

Miles de persones, 50.000 según la la Comisión 8M Asturies, enllenaron de malva les cais d’Uviéu na tarde d’esti domingu, 8 de marzu, nes movilizaciones pol Día Internacional de la Muyer. Pela mañana, les places de los ayuntamientos del país acoyeron tamién concentraciones baxo’l lema ‘Nosotres movemos el mundu’.

La cita principal taba prevista a les 17 hores n’Uviéu, que sustituyía nesta ocasión a Xixón como sede de la manifestación pol 8-M, una decisión tres la que taba la intención de señalar poles sos polítiques al alcalde Alfredo Canteli y al bipartitu del PP y Ciudadanos que gobierna dende les eleiciones de mayu la ciudá. A esa hora salíen dende trés puntos trés columnes de muyeres pa coincidir toes na Escandalera: na plaza América, poles que cuiden; na Estación del Norte (RENFE), poles que falten; y na cai Víctor Chávarri, poles que vienen.

Na plaza asitiada xunto a la Xunta Xeneral, onde’l bipartitu colocó una bandera d’España de grandes dimensiones con un gastu superior a los 50.000 euros, les convocantes entamaron l’aición que teníen preparada en secretu. Un grupu de muyeres llevantó un palu d’un altor asemeyáu al mástil de la ‘banderona’ nel que llució un estandarte feminista en contraposición a la mesma ente los aplausos de los presentes.

La manifestación, que taba centrada principalmente nos cuidaos, finó na plaza de la Catedral, onde se lleó’l manifiestu d’esti 8-M. “Tomamos Uviéu, tamos paralizando la capital d’Asturies”, celebraron, pa depués reivindicar “una sociedá xusta, igualitaria y feminista pa toes” que tenga los “cuidaos nel centru”.