Alonso anuncia qu'esti añu tará regulada l'acreitación de conocimientu d'asturianu

|
Genaro Alonso

La diputada d'IX Concha Masa demanda al conseyeru d'Educación y Cultura más "decisión y valentía" col plan pilotu.

L'acreitación del conocimientu de llingua asturiana, siguiendo'l marcu européu, será una realidá a finales d'añu. Genaro Alonso cumpliría asina con ún de los sos oxetivos marcaos al comienzu de la llexislatura, llista na que tamién ta la creación de la especialidá docente de Llingua Asturiana y Gallego-asturiaño, anguaño paralizada pola posición que caltién el Ministeriu d'Educación y Cultura.

Con esti avance sería posible que los ciudadanos pudieren certificar el so nivel de conocimientu d'asturianu, como anguaño se pue facer con otres llingües, dende l'inglés al gallegu. "Será un pasu cualitativu importante'l poder facer esta prueba de nivel", señaló na Xunta Xeneral Alonso, que destacó que "la llingua nun ye un problema; ye una solución".

La intervención del conseyeru vieno por una entruga de Masa sobre'l Plan Pilotu esperimental de Promoción del Usu del Asturianu pa facer vehicular l'idioma nuna materia d'un cursu de Primaria, solicitando-y la diputada más "decisión y valentía" nesti asuntu. Alonso señaló nesi sen l'ampliación del mesmu a más colexos pal cursu viniente y aprovechó pa defender la llegalidá del mesmu, que foi recurríu pol Partido Popular (PP) y nun almitíu a trámite pol Tribunal Superior de Xusticia d'Asturies.

Contador Estadistiques