La selmana última hebo una media de 154 contaxos diarios

Sigue la tendencia descendente: 226 rexistróse l'anterior. Piloña entra en riesgu estremu y Avilés y Castrillón tornen a les restricciones venceyaes a esti nivel d'alerta.

A falta de la espublización de los datos oficiales de la COVID-19, la Conseyería de Salú informó de 110 contaxos ayeri, lo que fai que la cifra de la fin de selmana algamara 404: el vienres detectáronse 156 positivos y el sábadu, 139. En comparanza colos mesmos díes de l'anterior, son 142 menos (546).

Na selmana última rexistráronse 1.080 casos nuevos al pasar de 41.495 a 42.575 –l'actualización, cola incoporación de 15 casos non contabilizaos en díes previos, pon el total en 42.590–. Supón una media de 154 diarios confirmando la evolución descendente nesti tramu de la tercer fola de la pandemia.

Dende que principiara ésta la evolución ye la siguente: 78, 101, 167, 292, 421, 482, 383, 226 y los 154 actuales. Ye una cantidá que s'asemeya a la esistente na primer quincena d'avientu.

La tasa de positividá a 7 díes el sábadu yera del 6,31 por cientu, cuando hai una selmana taba nun 7,2 por cientu –cola actualización esti porcentaxe baxa ayeri al 6,21 por cientu–. El vienres foi del 7,38 por cientu, el sábadu del 6,98 por cientu y ayeri del 5,32 por cientu.

22 finaos

No que respeuta a les muertes, hebo que llamentar 22, 13 homes y 9 muyeres que nun vivíen en residencies de mayores: 6 el vienres, 11 el sábadu y 5 ayeri. Dende qu'entamó l'andanciu finaron cola enfermedá causada pol coronavirus SARS-CoV-2 un total de 1.729 persones.

Hai hospitalizaos 388 pacientes con confirmación o sospecha de COVID-19, a los qu'hai que sumar 124 que tán na UCI. Son 24 y 3 menos que'l xueves.

10 conceyos en nivel 4+

Nuna tendencia de salida de riesgu estremu, Piloña va contracorriente y nel nivel d'alerta 4+, con zarru perimetral dende'l miércoles. Súmase asina a Avilés, Castrillón, Corvera Uviéu, Gozón, Xixón, Carreño, Ḷḷena y Ayer.

D'éstos, cinco teníen, pol son nivel de tresmisión altu del coronavirus SARS-CoV-2, restricciones más dures. L'ameyoramientu de los datos n'Avilés y Castrillón faen que dende mañana pasen a les midíes xenerales del 4+, que posibilita l'usu de terraces a la hostelería, dalgo que nun se da en Corvera, que sigue coles esceicionales, al igual que Ḷḷena y Ayer, onde se prorroguen 14 díes más.

Mentes, Llaviana abandonó güei'l zarru perimetral y torna a tener les normes comunes aplicaes al conxuntu del país cola esceición d'estos 10 conceyos. Pa consultar la situación de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na imaxe, L'Infiestu. Semeya obra de Rodelar baxo llicencia CC BY-SA 4.0.