Salú comunica 139 casos nuevos de COVID-19

La tasa de positividá queda nun 5,05 por cientu. Xixón abre'l zarru perimetral esti vienres y Corvera torna a les midíes 4+.

A falta de la espublización de los datos oficiales de la COVID-19, la Conseyería de Salú informó de la detección de 139 casos de COVID-19 ayeri. Son 20 menos que'l martes, cuando se rexistraron 159 –anque les cifres actualizaes aumentaron la cantidá hasta 172 por positivos non contabilizaos en díes anteriores–.

Fixéronse 4.200 pruebes de diagnósticu d'infeición activa, polo que la tasa de positividá s'asitió nel 5,05 por cientu, inferior a la de la xornada previa, cuando quedó nel 5,18 por cientu. A 7 díes esti porcentaxe'l martes yera del 5,99 por cientu.

Na xornada finaron 6 persones cola enfermedá causada pol coronavirus SARS-CoV-2: cuatro homes de 86, 85, 83 y 73 años y dos muyeres de 88 y 75, de les qu'ún vivía en residencia de mayores. Dende qu'entamó l'andanciu hai que llamentar 1.743 perdes.

331 pacientes tán hospitalizaos con confirmación o sospecha de COVID-19, mentes qu'hai otros 112 na UCI. Son 15 y 5 menos que'l martes.

6 conceyos en riesgu estremu

Salú decretó l'apertura mañana del zarru perimetral de Xixón, que sal del riesgu estremu. D'esta forma son 6 los conceyos que siguen en nivel d'alerta 4+: Avilés, Castrillón, Corvera y Piloña, amás de Ḷḷena y Ayer, con midíes más restrictives pol so altu nivel de tresmisión del coronavirus SARS-CoV-2, situación de la que salió precisamente güei Corvera.

Pa consultar la situación de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

33 biltos activos

Asturies informó al Ministeriu de Sanidá de la esistencia de 33 biltos activos, 3 menos qu'hai una selmana, con un total de 274 casos. 7 d'ellos detectáronse estos 7 díes últimos, comunica la conseyería.

Na semeya, Xixón esti meudía, col paséu de Begoña al fondu.