'¿Cuála ye?' llega al tramu final del micromecenalgu popular a 4 xuegos del oxetivu de 700 entrugues

Esta selmana fina la campaña d'Acuto Xuegos, que lleva recaudaos un total de 5.835 euros.

Tres algamar en namái 9 díes los 4.500 euros necesarios, asegurábase la edición de '¿Cuála ye?', un xuegu de mesa p'adultos d'entrugues sobre Asturies n'asturianu siguiendo una llinia asemeyada al popular ‘Trivial Pursuit nel que tán collaborando el biólogu y escritor Bertu Ordiales, l’etnógrafu Alberto Álvarez Peña, la escritora Laura Marcos, l’historiador Rubén Magadán, el filólogu Julio González Trabanco, el músicu Daniel García de la Cuesta, el profesor Víctor Suárez o los miembros de la Sociedá Etnomotora Asturiana (SEMA), amás del tamién historiador Rafael Rodríguez Valdés en llabores d’asesoramientu, ente otros. El siguiente oxetivu d'esta campaña de micromecenalgu popular na rede al traviés de la plataforma Verkami yera llegar a los 6.000 euros p'ampliar les 600 preguntes del xuegu base a 700, cifra que ta mui cerca de cumplise.

Anguaño les perres recaudaes son 5.835, polo que namái se necesitaríen vender 4 xuegos más pa facer más completu'l mesmu, siendo'l plazu hasta'l domingu pela mañana. La meta siguiente, la de les 800 entrugues, sería con 7.500 euros.

Na semeya, cadarma del tableru de '¿Cuála ye?' a partir de la que trabaya Acuto Xuegos.