“Con esti xuegu pretendemos recoyer la riqueza d’Asturies en toles estayes y divulgala ente la xente”, asegura Fernández

|
Entrugues 'Cuála ye'

Esti martes a les 10 hores va entamar, con delles ufiertes, el micromecenalgu popular pa ‘¿Cuála ye?’, primer xuegu de mesa p’adultos n'asturianu. “Con esti xuegu pretendemos recoyer la riqueza d’Asturies en toles estayes y divulgala ente la xente”, asegura Félix Fernández Rodríguez, responsable d’Acuto Xuegos.

‘¿Cuála ye?’ ye un xuegu d’entrugues sobre temes d’Asturies y n’asturianu que sigue una llinia asemeyada al popular ‘Trivial Pursuit’. Los xugadores, de 2 a 4 n’individual, cola posibilidá d’ampliar esti númberu xugando por equipos, van tener que responder cuestiones sobre historia, cultura, llingua y lliteratura, ciencies y naturaleza, deportes y entretenimientu, y xeografía y conceyos, p’algamar fiches de respuesta de cada estaya según ónde caigan nun tableru de tamañu 48x48 centímetros al traviés d’un dau.

El xuegu base va contar con 600 preguntes –esta cantidá podría ampliase según se cumplan oxetivos na campaña de micromecenalgu– que tán ellaborando dellos collaboradores espertos en cada campu. Asina, tán nel proyeutu’l biólogu y escritor Bertu Ordiales, l’etnógrafu Alberto Álvarez Peña, la escritora Laura Marcos, l’historiador Rubén Magadán, el filólogu Julio González Trabanco, el músicu Daniel García de la Cuesta, el profesor Víctor Suárez o los miembros de la Sociedá Etnomotora Asturiana (SEMA), amás del tamién historiador Rafael Rodríguez Valdés en llabores d’asesoramientu, ente otros.

“Con esti xuegu pretendemos recoyer la riqueza d’Asturies en toles estayes y divulgala ente la xente; deprender y divulgar”, esplica Fernández Rodríguez, optimista ente les reaiciones de la xente tres dar a conocer el proyeutu nes selmanes últimes en redes sociales. “La respuesta ta siendo bona”, añade, al tiempu que cifra en 4.500 euros la cantidá necesaria pa que ‘¿Cuála ye?’ sía una realidá.

Un preciu de 40 euros, con promociones les primeres 48 hores

Mañana va comenzar la campaña de micromecenalgu popular na rede, al traviés de la plataforma Verkami, a les 10 hores con delles ufiertes. Asina, les cinco primeres persones que participen na mesma van poder llevar el xuegu por un preciu de 35 euros.

Amás, les 48 primeres hores va tar a la venta ‘¿Cuála ye?’ por 37 euros, una rebaxa de 3 euros con respeuto al restu de la campaña. A partir del xueves el so preciu va quedar en 40, “asemeyáu a proyeutos similares que s’entamaron en gallegu y n’eusquera”, esto ye, 37 y 42 euros, de manera respeutiva.

Na imaxe, un exemplu de tarxeta d'entregues de ‘¿Cuála ye?’.

Contador Estadistiques