El xuegu '¿Cuála ye?' va ser una realidá tres algamar en 9 díes los 4.500 euros marcaos

Queden entovía 30 díes de campaña de micromecenalgu, cola intención agora d'aumentar el númberu de 600 entrugues afitáu de primeres nesti proyeutu.

El xuegu de les entrugues sobre Asturies n'asturianu, el primeru de los nomaos 'de mesa' p'adultos na nuesa llingua, va ser una realidá. Yeren necesarios 4.500 euros pa llevar alantre el proyeutu y a les seis hores yá llevaba 1.392 recaudaos, casi un terciu del total.

La campaña de micromecenalgu popular na rede al traviés de la plataforma Verkami siguió a bon ritmu los díes siguientes y finalmente ayeri algamóse l'oxetivu inicial. Agora, Acuto Xuegos marca un segundu: llegar a 6.000 euros de recaudación p'aumentar el númberu d'entrugues del xuegu de 600 a 700.

"Nestos momentos sólo quedaríen 30 unidaes del xuegu pa llegar a esti oxetivu ¡y queden 30 díes de campaña!", celebren dende esta empresa familiar, sorprendida pol sofitu ampliu recibíu. Nel casu de consiguilo, el siguiente sería llegar a 800 entrugues.