El xuegu '¿Cuála ye?' asegura les 700 entrugues

El siguiente oxetivu queda marcáu nes 750, pa lo que sería necesario vender 8 unidaes más.

Faltaben 4 xuegos p'algamar los 6.000 euros de recaudación p'asegurar les 700 entrugues, 100 más que les que diba tener el proyeutu inicial, pero la campaña de micromecenalgu popular al traviés de la rede Verkami vivió un reblagu dende'l llunes que permitió superar dicha cifra, asitiándose nel momentu de la redaición d'esta noticia en 6.427 euros. Acuto Xuegos, que tenía afitada la cantidá de 7.500 euros pa llegar a les 800 preguntes, abre la posiblidá agora de medrar en 50 más si s'algamen 6.750 euros.

El domingu a les 10.30 hores va zarrase'l plazu pa collaborar y nestos momentos faen falta 8 unidaes más pa cumplir l'oxetivu nuevu de facer más completu'l primer xuegu de mesa p'adultos n'asturianu, que va tar centráu n'entrugues sobre Asturies y la nuesa cultura dafechu. Les seis estayes d'esti xuegu que sigue la llinia del popular 'Trivial Pursuit' son historia, cultura, llingua y lliteratura, ciencies y naturaleza, deportes y entretenimientu, y xeografía y conceyos.

Na semeya, a la izquierda, cadarma del tableru de '¿Cuála ye?' a partir de la que trabaya Acuto Xuegos, xunto con otru del popular 'Trivial Pursuit'.