Iniciativa pol Asturianu torna a solicitar enmiendes a los PXE del Partido Popular pa incorporar una partida pa l’ALLA

L’Academia de la Llingua Asturiana (ALLA) sigue siendo la única de les esistentes de los idiomes estatales que nun recibe partida nenguna nos Presupuestos Xenerales del Estáu. Iniciativa pol Asturianu torna a solicitar a los partíos enmiendes a les cuentes del PP pa incorporar financiación pa la institución asturiana.

L’añu pasáu esti tuvimientu tuvo l’ecu de dellos partíos, como’l PSOE, Xuníos Podemos-En Comú-En Marea y los valencianos Compromís, pero la enmienda valtóse nel Senáu, onde’l PP tien mayoría absoluta, col votu contrariu tamién de Foro. La senadora Rosa Domínguez de Posada salió darréu escusándose por esta decisión al argumentar que les enmiendes presentaes por Compromís votáronse en bloque y ente elles “taba la de la llingua”.

Iniciativa pol Asturianu torna nesta ocasión a solicitar a los partíos que presenten enmiendes pa que l’ALLA pueda recibir una partida al igual que vienen recibiendo l'Institut d'Estudis Catalans (283.070 euros l’añu pasáu), la Real Academia Galega (283.070) y la Euskaltzaindia (153.180). Pela so parte, la Real Academia Española (RAE) ingresó nel 2017 1.661.290 euros –amás d’otres partíes pa proyeutos concretos– y la Comisión Permanente de l’Asociación de Academias de la Lengua Española, 76.050.

D’esta forma el coleutivu que trabaya pola normalización del idioma pretende que se fine “con esti agraviu y lo que consideramos una inxusticia pa la llingua asturiana”, una decisión cola que’l PP tien la oportunidá “de demostrar que daveres nun ta en contra del asturianu, apoyando un pasu pal que nun ye necesaria la oficialidá a la que s’oponen. Ye la ocasión de desbloquiar esta partida pa l’ALLA, que nun ye más que la busca d’igualdá ente les academies que representen y curien les llingües del estáu”.