Chao Samartín: una obra de posibles daños irreversibles

El Proyeutu de Consolidación del Xacimientu Arqueolóxicu del Chao Samartín, impulsáu pol Conceyu de Grandas de Salime col sofitu del Gobiernu, ta provocando crítiques d’espertos y la oposición del restu de grupos políticos. La razón ye la decisión d'entamar unes obres que podríen tener consecuencies irreversibles pal castru.

El grupu parllamentariu d’Izquierda Xunida (IX) ye’l que ta liderando la llucha política pa paralizar unos trabayos entovía pendientes de trámites pa’l so comienzu –entá nun se fixo la contratación de la empresa que s’encargue de la obra– y que cuenta con subvención estatal de 499.698,58 euros a cargu del 1,5 por cientu cultural, esto ye un 67,5 por cientu del total del presupuestu. “Pidimos que se paralicen porque tenemos series duldes sobre la so conveniencia. Tenemos munches sospeches de que pueda haber daños irreversibles”, asegura la diputada Concha Masa a Asturies.com.

Esta opinión nun ye única de la coalición, puesto que PP, Podemos y Foro, esto ye, la totalidá de la oposición, votó na Xunta Xeneral a favor d’una moción que solicitaba la revisión del proyeutu de consolidación del castru de Chao Samartín. Una idea na que coinciden arqueólogos y coleutivos como la Lliga Celta d’Asturies.

Los argumentos espresaos son que dichu proyeutu, con una inversión de cerca de 750.000 euros (285.000 correspuenden a obres d'emerxencia), ta ellaboráu por arquiteutos, con ausencia d’informes d’arqueólogos y conservadores. L’espediente, según aseguren los que pudieron tener accesu al mesmu, ta enllenu de "chambonaes más propies d’otru tiempu”, como ye l’usu de materiales que nun son reversibles, como’l cementu armáu; la reconstrucción masiva cuando debería haber una mínima intervención nel castru; y, sobre manera, la construcción d’un centru d’acoyida de visitantes sobre zones arqueolóxiques pendientes d’estudiu.

Postura “inamovible”

Masa espera que la moción aprobada’l 16 de marzu faiga recapacitar al Gobiernu sobre “unes consecuncies catastrófiques” nun xacimientu de gran valir históricu y arqueolóxicu que data de la Edá del Bronce, depués de que la postura hasta’l momentu del conseyeru d’Educación y Cultura, Genaro Alonso, fora “inamovible”. Sicasí, va llevar tamién l’asuntu al Congresu, cola presentación por parte de Xuníos Podemos d’una batería d’entrugues nos que se cuestiona al Ministeriu de Fomentu polos controles efeutuaos a la hora de roblar l’alcuerdu que financia al traviés del 1,5 por cientu cultural.

“Volvemos a reiterar les nueses duldes y plantegamos-yos si-yos consta que’l proyeutu nun contién los informes preceptivos de los espertos”, señala, pa depues puntualizar que “falta un documentu onde s’identifiquen los elementos orixinales y la so datación, una memoria histórcia del xacimientu, les consultes que deberíen facese a los investigadores titulares del xacimientu mientres décades…”. Tamién entruga al ministeriu si tienen conocimientu “del tipu d’actuaciones y de materiales que se van utilizar que, según opiniones d’espertos, pueden ser mui dañines sobre’l conxuntu monumental y tolos valores que representa, amás, de manera irreversible”, esplica Masa.

Actuaciones afayadices

Espertos consultaos por esti diariu dixital coinciden en que la non intervención nel castru xeneraría “menos dañu que les obres previstes”, destacando que les posibles aiciones deberíen tar encaminaes a la non degradación del mesmu. Asina, apunten que les actuaciones afayadices pa la conservación de Chao Samartín deberíen tar orientaes a la fin de les investigaciones pendientes, la creación d’un discursu museísticu y la ellaboración d’un plan d’investigación.