IX critica que la intervención nel castru de Chao Samartín tea más encaminada al turismu qu’al estudiu arqueolóxicu

Ramón Argüelles, coordinador xeneral d’Izquierda Xunida (IX), visitó esti martes el castru de Chao Samartín en compañía de la diputada Concha Masa y de Juan Ponte, secretariu d'aición política. La coalición critica que la intervención prevista nel xacimientu tea encamináu al turismu y pide que se dea voz a los especialistes.

La paralización del Proyeutu de Consolidación del Xacimientu Arqueolóxicu del Chao Samartín, impulsáu pol Conceyu de Grandas de Salime col sofitu del Gobiernu, y que cuenta cola oposición del restu de grupos parllamentarios de la Xunta Xeneral, sigue siendo un asuntu prioritariu pa IX. Los trés dirixentes realizaron na mañana d'ayeri una visita pel castru col oxetivu de ver en primer mano la situación d’esta xoya arqueolóxica.

Masa, que ta llevando esti asuntu nel Parllamentu, amosó’l so esmolecimientu polos efeutos d’unes intervenciones que, na so opinión, paecen tar encaminaes hacia una esplotación turística en llugar d’hacia la recuperación del Chao Samartín como xacimientu arqueolóxicu. Pela so parte, Argüelles considera imprescindible que se dea voz a los especialistes, evitando intervenciones politizaes.

Poro, IX esixe que la intervención nel castru siga los estándares arqueolóxicos internacionales, evitándose aiciones que podríen ser irreversibles nun xacimientu de gran valir históricu que data de la Edá del Bronce.

Na semeya, Argüelles, Masa y Ponte mientres la so visita al castru.