Foro reclama nel Senáu “un siguimientu fondu a la intervención prevista nel Chao Samartín”

Rosa Domínguez de Posada rexistró nel Senáu un moción pa que “el Gobiernu inste a facer un siguimientu fondu a la intervención prevista nel xacimientu arqueolóxicu de Chao Samartín”. Ésta debatiráse y votaráse na Comisión de Cultura de la Cámara Alta.

Na mesma tamién solicita que “una vegada comprobaos los espedientes alministrativos y d’obra, si se constata qu’escarez de garantíes, se retire l’apoyu de l’aplicación del 1,5 por cientu cultural y se paralicen les obres”. Nel testu presentáu, Foro recuerda que “al importante xacimientu hai d’aplica-y el más rigurosu marcu xurídicu de proteición tanto pola normativa autonómica como estatal”.

“La falta de rigurosidá na tramitación del Espediente d’Intervención nel Xacimientu Arqueolóxicu del Chao Samartín, xunida al historial d’actuaciones polítiques por parte de l’autoridad llocal, esixe la toma de toles midíes posibles a fin de que nun se vía dañáu de manera irreversible ún de los xacimientos más importantes p’Asturias y pa tol noroeste peninsular”, concluyó la senadora sobre esta moción que s'aldericará y votará nel próximu periodu de sesiones. La Xunta Xeneral yá se posicionara’l pasáu 16 de marzu contra esti proyeutu tres una moción d’Izquierda Xunida (IX) que namái atopó la posición contraria del PSOE, partíu nel Gobiernu.