Foro insiste en que l'actuación nel Chao Samartín "supón una agresión al patrimoniu"

La conseyera Piñán defende que'l proyeutu refundíu incorpora "toles propuestes al rodiu la recuperación y consolidación" del castru.

Adrián Pumares, diputáu de Foro, interpeló al Conseyu de Gobiernu sobre'l Proyeutu de Consolidación del Xacimientu Arqueolóxicu del Chao Samartín esta mañana nel Plenu de la Xunta Xeneral. Na so intervención apuntó que'l Conceyu de Grandas de Salime "entamó los trámites pa contratar la redaición de los pliegos de contratación del proyeutu de obres nel Chao Samartín" que, afirma, "nun ye otru que l'orixinal que dio llugar al refugu, non sólo d'esta Xunta Xeneral, sinón tamién, y amás de manera unánime, de profesionales y d'instituciones venceyaes cola conservación y cola investigación del Patrimoniu Cultural".

Darréu, tres esponer dellos aspeutos de los informes, entrugó a Piñán si va ser "cómplice, yá sía por aición o omisión, de cometer esti atentáu al nuesu patrimoniu arqueolóxicu con plenu conocimientu de causa". "Nesi casu, esta agresión a la nuesa cultura y al nuesu patrimoniu será responsabilidad de so de manera esclusiva, como conseyera de Cultura del Principáu d'Asturies. Pido-y que reflexone", añadió.

Cambios sobre l'orixinal

Na so respuesta, Piñán señala que "tolos informes internos de la conseyería, como'l d'Elías Carrocera, constaten que'l proyeutu ye correutu y que cumple la normativa nacional y los criterios internacional d'intervención patrimonial". "Los axustes incorporaos al proyeutu a efeutuar n'obra constarán nel conveniu de collaboración que circunscribirán pronto la conseyería y el Conceyu de Grandas de Salime", una collaboración "que pue facer efeutiva la gran parte de la cantidá que ye l'importe a cargu del 1,5 por cientu cultural".

Estes modificaciones al proyeutu orixinal "son les más contestaes y más polémiques", como "la solución constructiva pa la restauración del muru oeste de la plaza B3 mediante la consolidación de la ruina esistente que se va facer ensin proceder a la reconstrucción del so alzáu", punxo d'exemplu.

Les répliques

Pumares criticó na réplica que "los anuncios de modificaciones, nunca llevaes a un documentu, prodúcense como consecuencia de les denuncies interpuestes énte vustedes,énte'l ministerio y énte'l Defensor del Pueblu polos científicos y profesionales con esperiencia acreitada na materia". "Señora conseyera, ta vusté asumiendo personalmente la responsabilidá d'un proyeutu nel que converxen, nuevamente, los mesmos actores y circunstancies que propiciaron, hai una década, cola mesma mala voluntá y incivilidá qu'agora, l'asaltu al Museo Etnográfico de Grandas de Salime, y l'atropellu d'un ciudadano exemplar como foi don José María Naveiras, al que vusté ta acabente d'empoderar públicamente", añadió.

Por último, Piñán respondió al diputáu de Foro que'l proyeutu refundíu incorpora "toles propuestes al rodiu la recuperación y consolidación" del castru y dio l'alderique por fináu pa nun allargar la situación otros 15 años. "Sí hai otra manera, que ye nun facer nada y dexar que se caiga, y ye la manera que nun quier asumir la mio conseyería", apuntó al tiempu que recordó la oportunidá única que supón el 1,5 por cientu cultural.