Celaá sigue dando llargues cola especialidá docente: agora quier esperar a que se declare la oficialidá

|
Carmen Suárez y Isabel Celaá

La ministra d’Educación y Formación Profesional, María Isabel Celaá, sorprendió esti miércoles cola so posición sobre la especialidá docente de Llingua Asturiana y Gallego-asturiano. Nun va modificar el real decretu pa permitir la so creación, prefiriendo esperar a que les dos llingües sían declaraes oficiales pa dar esti pasu.

Foi la posición qu’amosó ayeri, según informó Europa Press, tres l’alcuentru en Madrid cola conseyera d’Educación, Carmen Suárez Suárez, dientro de la serie d’entrevistes colos tolos responsables autonómicos. La vasca dixo tener “un gran respetu pol asturianu”, pero nun va modificar los reales decretos p’ameyorar les condiciones del profesoráu qu’imparte les materies de Llingua Asturianu y Gallego-asturianos y igualales a les de los sos compañeros.

Ello ye que va esperar a que se declare la oficialidá, dalgo nesta llexislatura a priori imposibles pola falta d’un votu pa entamar la reforma del Estatutu d’Autonomía y les posiciones que caltienen los partíos. Mentes considera que “les necesidaes o demandes” de clase d’asturianu y gallego-asturiano “tán cubiertes”.

Pela so parte, la conseyera señaló sobre l’alcuentru no que respeuta a la llingua asturiana que “saben que ye una llingua propia, que ye una llingua que ta en situación normalizada dientro’l sistema educativu”. Sobre la especialidá, comentó que “hai sensibilidá pa podelo abordar pero dientro d’un contestu d’estudiu y análisis” pendiente d’una situación de cooficialidá.

Na semeya, Suárez y Celaá.

Contador Estadistiques