“L’Academia y la Conseyería d’Educación compartimos l’análisis y les soluciones a la enseñanza del asturianu”, afirma González Riaño

|
Carmen Suárez conferencia sectorial Educación Isabel Celáa

La especialidá docente y les posibilidaes qu’ufre la Llei Orgánica de Modificación de la LOE (LOMLOE) a la materia de Llingua Asturiana foron los asuntos trataos nuna xunta “gratificante” ente Xosé Antón González Riaño y la conseyera Carmen Suárez. “Compartimos l’análisis y les soluciones a la enseñanza del asturianu”, afirmó’l presidente de l’Academia de la Llingua Asturiana (ALLA).

Suárez comunicó na sede de la Conseyería d’Educación a González Riaño cómo trescurrió la primer xunta en febreru con Isabel Celaá, na que la ministra treslladó la so negativa a modificar el real decretu pa permitir creación de la especialidá docente de Llingua Asturiana y Gallego-asturiano, prefiriendo esperar a que les dos llingües sían declaraes oficiales pa dar esti pasu. “Tresmitióme la respuesta inmediata d’Adrián Barbón, esi mesmu día, sobre la importancia estratéxica que tien pa la ensañanza n’asturianu y la seguranza de que nun diba arrenunciar a ello”, rellata.

La intención del Gobiernu ye solucionar esta vieya demanda de tol sector educativu asturianu esta mesma llexislatura y, pa ello, unvío al ministeriu una documentación que González Riaño calificó de “importante”. Trátase d’una propuesta concreta de redaición de cómo debería ser la modificación del real decretu d’especialidaes, información sobre’l marcu llegal actual y datos estadísticos.

Materia voluntaria

Tamién hai concidiencia ente la conseyería y l’Academia de la Llingua Asturiana (ALLA) no que respeuta a “les posibilidaes más amplies” qu’abre la LOMLOE pa la materia de Llingua Asturiana y Gallego-asturiano al ser les autonomíes les que decidan el so encaxe nel currículu educativu. En concreto, la disposición adicional trentena octava ‘Llingua castellana, llingües cooficiales y llingües que gocien de proteición llegal’ afita nel so puntu quintu que “aquelles comunidaes autónomes nes qu’esistan llingües cooficiales que nun tienen esi calter en tol so territoriu o llingües non oficiales que gocien de proteición llegal podrán ofreceles nos términos que determine la so normativa reguladora”.

“L’alcuerdu nesti puntu ye total”, afirma González Riaño, y consiste “en promulgar que la LOMLOE s’afaye a la Llei d’Usu”. Esto significa que la materia pasaría a ser voluntaria, como marca la normativa, y dexaría de ser optativa, como asocede agora en toles etapes educatives, compitiendo con Cultura Asturiana en Primaria, y con una segunda llingua estranxera o otres materies en Secundaria y Bachilleratu.

“Nun se pue discriminar a nengún alumnu por estudiar asturianu”, añade’l presidente de l’ALLA. La Llei Céela, qu’aporta pa derogar la Llei Orgánica pa la Meyora de la Calidá Educativa (LOMCE), yá pasó les enmiendes a la totalidá nel Congresu y, tres la so aprobación definitiva, el Gobiernu d’Asturies tendrá ente 6 y 12 meses p’afayar los decretos propios.

Na semeya, Suárez sigue una intervención de Celaá na xunta telemática de la Conferencia Sectorial d'Educación celebrada'l día 11.

Contador Estadistiques