Celaá tamién llanza balones fuera con respeuto a la especialidá docente

|
SUATEA manifestación oficialidá 6-A

La ministra socialista d’Educación y Formación Profesional, Isabel Celaá, nun va dar el pasu de crear la especialidá docente d’asturianu y gallego-asturiano. Ye lo que s’entiende de la respuesta evasiva dada a SUATEA, que demandaba la introducción d’una modificación nos decretos d’especialidaes que permitiera la so regulación.

L’escritu presentáu en xineru pol sindicatu educativu solicitaba a Celaá la inclusión nel artículu 2.2 del Real Decretu de Maestros y nel artículu 2.3 del Real Decretu de Secundaria del testu “naquelles comunidaes autónomes nes qu'haya llingües non oficiales que tengan proteición llegal y formen parte del currículu, podrá dase tamién, a pidimientu de la comunidá autónoma y según necesidaes educatives, la especialidá propia de la llingua respeutiva”, mesmu criteriu que se siguió pa encaxar l'asignatura de Llingua Asturiana y de Gallego-asturiano na LOMCE. La so respuesta al mesmu, depués d’un repás a la normativa vixente, conclúi que “nun procede incorporar a la normativa básica (Decretu Especialidaes Docentes) aspectos referíos a la so regulación, al considerar qu’Asturies ye competente a tolos efectos na regulación de les árees y materies de llibre configuración autonómica (onde tán inxeríes les nuestres llingües) tanto nel desarrollu curricular como na acreitación de la cualificación específica afayadiza pa impartiles”, rellaten dende’l Sindicatu Unitariu Autónomu de Trabayadores de la Enseñanza d’Asturies (SUATEA).

Darréu espliquen que “efectivamente, Asturies tien competencia pa determinar la cualificiación específica pa impartir estes materies (tolos estremaos títulos y acreditaciones reconocíos pol Rexistru d’Acreditación de Llingua Asturiana y Gallego-Asturiano), pero estos títulos nun tienen la mesma consideración que los reconocíos nel Decretu d’Especialidaes, pues al nun tar nelli, tórgase-yos la posibilidá d’entrar a formar parte de les plantiyes orgániques del profesoráu y, polo tanto, la posibilidá d’acceder a un puestu de trabayu estable en condiciones d’igualdá coles otres especialidaes. D’ehí’l nuesu pidimientu”. Por ello, entiende que la ministra socialista “con esta rempuesta evasiva, igual que los anteriores ministros del PP y el Gobiernu asturianu al nun apoyar la oficialidá na Xunta asturiana, afuxe de la so responsabilidá y competencia esclusiva na modificación del Decretu Especialidaes Docentes y condena a los y les enseñantes asturianos a la precaridá y la marxinación”.

Compromisu del Gobiernu

La creación de la especialidá docente nesta llexislatura qu’enfila’l so fin yera ún de los compromisos del Gobiernu. Celaá prometiera ak conseyeru d'Educación y Cultura, Genaro Alonso, nuna entrevista celebrada'l día 16 en Madrid, a estudiar esta posibilidá, con esperanza de que tuviera una mayor sensibilidá al respeuto que los sos antecesores del PP, anque finalmente, tal como paez pola respuesta dada a SUATEA, la vasca nun va dar solución a un problema que se solucionaría, como tantos otros, cola declaración de la oficialidá de los dos idiomes.

Na semeya, la Delegación Sindicatal de SUATEA sofita la manifestación entamada pola Xunta pola Defensa de la Llingua Asturiana del 6 d'abril en Xixón baxo'l lema 'L'asturianu llingua oficial ¡agora!'.

Contador Estadistiques