Xuníes Podemos va rexistrar una PNL sobre la especialidá docente

“Nun pue ser que se-y ñegue al profesoráu d’asturianu y gallego-asturiano, por selo, estabilidá y dignidá llaboral”, asegura Sofía Fernández Castañón, diputada por Asturies y vocera axunta de Xuníes Podemos nel Congresu. La coalición va rexistrar una PNL sobre la especialidá docente pal so reconocimientu.

La Proposición Non de Llei, que va presentar a la Comisión d’Educación, busca encamentar al Gobiernu estatal la inclusión de Llingua Asturiana y de Gallego-asturiano nos reales decretos que regulen les especialidaes docentes en Primeria, Secundaria y Bachilleratu. D’esta forma, les maestres y maestros de la materia, condenaos anguaño a la interinidá, podríen optar a plaza, dando asina tamién estabilidá al so alumnáu.

Fernández Castañón recuerda qu’esta vieya demanda del sector educativu asturianu "pa correxir una situación de de desigualdá" vien reclamándola tamién el Conseyu Escolar del Estáu y que yá la llevara al Congresu nel 2016. Hasta la fecha’l Ministeriu d’Educación y Formación Profesional dio llargues al Gobiernu d’Asturies al respeuto y la yá ex ministra Isabel Celáa, sustituyida esti llunes por Pilar Alegría, confirmó en febreru del 2020 que dexaba aparcáu l’asuntu a la espera de la oficialidá de les dos llingües, lo que solucionaría darréu’l problema.