Carlos Madera diz que los asturianos tienen que decidir que tipu d’oficialidá quieren

El Director de la Oficina de Política Llingüística Ramón d'Andrés y el Director Xeneral de Promoción Cultural Carlos Madera presentaron esta mañana xunta los responsables de los servicios de normalización de Xixón (María Xosé Rodríguez), L.lena (Penélope Miranda) y Llangréu (Eloy Antuña) la rede de Conceyos de Normalización Llingüística. A la rueda de prensa asistieron tamién representantes d'otros conceyos que van dotase d'equí a poco de servicios d'esti calter, casu de Siero, representáu pola conceyala Patricia Rodríguez, y la Comarca del Cabu Peñes, representada por Silvia Artime. Namás faltó a la cita'l representante de la Comarca de la Sidra.

Ramón d'Andrés sorrayó na presentación de la rede que, anque esta ta de momentu entamando y namás cuenta con 16 conceyos de los 78, estos representen a más de 400.000 asturianos y asturianes, colo que más del 40% de la población asturiana va poder contar o cuenta yá con un serviciu de normalización nel so conceyu.

L'actu de presentación de la rede aprovechóse tamién pa dar a conocer la guía "Orientaciones pa la normalización llingüística nel ámbitu municipal" un llibrín de 60 páxines que contien encamientos y conceptos básicos sobre la cuestión y col que la Rede de Normalización de Conceyos quier allegase a toles instancies a nivel municipal. Nesti sentíu, Ramón d'Andrés esplicó que'l trabayu per conceyos, que tien de dir en paralelo al que se faiga dende'l Principáu, ye básicu p'algamar una normalización real. Nesti sentíu, la rede acabante crear va mandar esta guía a tolos conceyos d'Asturies y entamar una serie d'entrevistes con alcaldes y con instituciones como la Federación Asturiana de Conceyos col oxetivu de llegar a enxertar a los 78 conceyos asturianos.

La llende ente normalización llingüística y el reconocimientu llegal de la llingua al traviés de la oficialidá cola perspectiva d'una reforma estatutaria d'equí a poco planió penriba de la presentación, teniendo que responder los responsables de política llingüística a entrugues directes de los periodistes nesti sentíu. Mientres Ramón d'Andrés defendió la "llexitimidá" de plantegar la cuestión de la oficialidá, Carlos Madera foi un poco más lloñe y llegó a plantegar que los asturianos "tienen que decidir que tipu d'oficialidá quieren" anque la necesidá d'esi debate ye independiente de que l'executivu asturianu vaya defender o non l'enxertamientu de la oficialidá na reforma estatutaria, cuestión que quedó ensin rempuesta. Dambos responsables políticos sorrayaron que, anque nesti momentu lo más importante pal executivu asturianu yera consiguir una normalización efectiva del asturianu, y que tien que dase un debate "ensin rocea nin imposición" sobre los munchos modelos d'oficialidá qu'esisten.