Bimenes va aprobar la so ordenanza d’asturianu nel marcu de la XXI Fiesta de la Oficialidá

|
Bimenes va aprobar la so ordenanza d’asturianu nel marcu de la XXI Fiesta de la Oficialidá

El sábadu, coincidiendo cola XXI Fiesta de la Oficialidá, Bimenes va aprobar la so ordenanza d’asturianu nun Plenu estraordinariu. Hai un añu’l conceyu yerbatu declaraba la oficialidá per segunda vegada tres la del 1997 –torgada pol TSXA tiempu depués; sentencia ratificada pol Tribunal Supremu–, que ye orixe d’esta folixa.

“Con esta ordenanza lo que quermos ye plasmar realmente lo que yá se ta dando nel día a día nel Conceyu”, destaca l’alcalde Aitor García Corte. Basada na de Noreña, aprobada l’añu pasáu, va regular l’usu del asturianu y da-y validez al so emplegu xurídicu, “amás d’afitar la so presencia na señalización y documentación, dalgo que yá se vien faciendo, asina como’l compromisu del Ayuntamientu pa col idioma”.

L’aprobación del testu va tener llugar el sábadu al meudía, pa depués siguir con un actu nuevu d’hermanamientu con Miranda de l Douro que va consistir en dar el nome d’esti territoriu portugués que comparte llingua con Asturies a la plaza de la Casa Conceyu. Miranda, pela so parte, va entregar un morriyu de granitu a Bimenes.

Ésitu aseguráu de la xira popular

La folixa va continuar cola Danza de la Oficialidá y un pasucais del Ensame de Música Tradicional y el Grupu Folklóricu Los Yerbatos, que tamién va actuar nel prau del Palaciu del Marqués de Casa Estrada, onde va celebrase la xira popular. Como novedá nel programa festivu, incorpórase Mirandazas, que va actuar tamién xunto con Los Yerbatos.

“La xira popular foi l’añu pasáu un gran ésitu y esti añu tamién va selo, yá que tenemos toles silles ocupaes, más de 300, y tamos mirando n’ampliales”, apunta l’alcalde asturianista. P’acutar plaza na carpa ye necesario contautar cola Casa Conceyu enantes del xueves, pero tamién esiste la posibilidá de xintar nel prau.

La comida pue traese de casa, anque la organización tamién dispón d’un menú de parrilla por 22 euros qu’inclúi corderu a la estaca, costilles y chorizu criollu, amás d’ensalada y postre. La xente interesao tien que facer reserva, con plazu hasta’l xueves.

Tres la xinta, a les 17 hores, van comenzar los xuegos infantiles, pa depués dar pasu al IV Concursu d’Escanciadores de Bimenes, puntuable pal Campeonatu d’Asturies d’Echadores de Sidra. La cena nel prau ta prevista pa les 20 hores, pa siguir con un conciertu d’Anabel Santiago y un ‘Bimenes en Danza’, cola participación de Cantaruxare y L’Andecha Turcipié.

Selmana pola Oficialidá

Al igual que l’añu pasáu, el Conceyu de Bimenes allarga la celebración de la Fiesta de la Oficialidá con una serie d’actividaes previes baxo’l nome de ‘Selmana pola Oficialidá’. Ésta va comenzar mañana cola emisión en direuto dende la Casa de les Radios de Suares del programa de RPA ‘Asturias al día’, con comienzu a les 9 hores.

Pal xueves hai programada una ruta guiada per El Cordal, con salida a les 17 hores de Campabaxera y llegada a la hora de cenar, cola posibilidá de facelo nel área recreativa. Ésta tien un llargor de 10 quilómetros y una dificultá baxa. Pa participar ye necesario inscribise nel teléfonu 985.70.00.04 o nel corréu electrónicu adl@bimenes.es.

Por último, pa caldiar motores pal sábadu, el vienres van actuar Los Yerbatos nel Palaciu del Marqués de Casa Estrada a les 20 hores. La barra de la carpa va tar abierta pa esta actividá.

Contador Estadistiques